अनलाइन डबली
काठमाडौँ । कान्तिपुर पब्लिकेशनका अध्यक्ष कैलाश सिरोहियालाई प्रहरीले कार्यकक्षमै घेराउ गरेको छ । सादा पोशाकका प्रहरी अधिकारीहरुले सिरोहियालाई कार्यकक्षबाटै पक्राउबारे परामर्श गरिरहेका छन् ।
अध्यक्ष सिरोहियाले आफूलाई कानुनी परामर्शको लागि भन्दै समय मागेका छन् । प्रहरीले पनि कानुन व्यवसायीसँग परामर्श गर्न अनुमति दिएको छ ।
सिरोहियालाई पक्राउ गर्न काठमाडौँ उपत्यका अपराध अनुसन्धान कार्यालयका प्रमुख एसएसपी सानुराम भट्टराईसहितको टोली कान्तिपुर दैनिकको कार्यालयमै छ ।
सिरोहियाले प्रहरीसँग जान तयार भएका छैनन् तर प्रहरीले ल्याएर नफर्किने बताएको छ ।
पक्राउ पुर्जी जारी भएको सूचना पाएपछि सिरोहियाले सत्ता र शक्तिको दुरुपयोग गरेर कान्तिपुरमाथि विगतमा पनि हस्तक्षेप भएको बताए । उनले निरंकुश शाही शासनमा र लोकमान सिंह कार्कीसमेतका पालामा समाचार लेख्दा पनि कान्तिपुरमाथि यस्तै षड्यन्त्र भएको बताएका छन् ।
सिरोहियाविरुद्ध जिल्ला प्रहरी कार्यालय धनुषामा दोहोरो नागरिकता लिएको आरोपमा जाहेरी दर्ता भएको थियो ।
