अनलाइन डबली
काठमाडौं । सहकारी समस्या समाधानको लागि छानविन समिति बनाउन शिर्ष नेताहरु तयार भएका छन् । प्रमुख प्रतिपक्षको मागअनुसार कसैको नामै तोकेर नभई बिषयमात्र उल्लेख गरेर संसदीय छानविन समिति गठन गर्ने तयारी भइरहेको नेताहरुले बताएका छन् ।
सत्तारुढ दलका नेताहरु प्रधानमन्त्री प्रचण्ड, नेकपा एमाले अध्यक्ष केपी शर्मा ओली र उपप्रधानमन्त्री तथा गृहमन्त्री रवि लामिछानेबीच बिहान यसै बिषयमा छलफल भएको थियो ।
सभामुख देवराज घिमिरेले पनि नेताहरु र प्रमुख सचेतकहरुसँग यही बिषयमा केन्द्रित रहेर संसदको अवरोध खोल्न छलफल गरेका थिए ।
प्रधानमन्त्री प्रचण्डले नेताहरुसँगको छलफलपछि प्रमुख प्रतिपक्षी दललाई समिति गठन गर्ने सम्भावना रहेको भनेर जानकारी दिएका छन् । तर अपरान्ह चार बजे बस्ने बैठकमा गृहमन्त्रीलाई बोल्न दिने र अवरोध नगर्ने, त्यसपछि छानविन समितिको टुंगो लगाउने बताएका थिए ।
एमाले अध्यक्ष केपी शर्मा ओलीको विपक्षी दल र न्यायालय लक्षित तीखो आलोचनाले सहमतिको वातावरणमा नकारात्मक असर परेको प्रधानमन्त्री निकट सूत्रले बताएको छ । एमाले संसदीय दलको वैठकमा ओलीले बुधबार नेपाली कांग्रेस र सर्बोच्च अदालतको नामै लिएर कडा टिप्पणी गरेका थिए । उनको त्यो अभिव्यक्तिले प्रधानमन्त्री दाहाल नै अप्ठेरोमा परेको बताईएको छ ।
प्रमुख प्रतिपक्षले अहिलेसम्म आफ्नो अडानमा हेरफेर गरेको छैन । नेपाली कांग्रेसका सांसद वद्री पाण्डेले आफ्नो पार्टीका अडान यथावत नै रहेको बताए ।
एमालेका सांसद सूर्य थापाले अर्बौं रुपैंयाँ अपचलन भएको सहकारीको बिषयमा छानविन हुनुपर्छ भनेर आफूले चैतमै संसदमा बोलिसकेको स्मरण गर्दै कुनै व्यक्तिको नाम उल्लेख गर्न आवश्यक छैन तर समिति बन्नुपर्छ भने ।
सहकारीको बचत अवैध अपचलनमा उपप्रधानमन्त्री तथा गृहमन्त्री रबि लामिछानेको नाम मुछिएकोमा अनुसन्धान गर्न संसदीय छानविन समिति गठन हुनुपर्ने माग गर्दै प्रमुख प्रतिपक्षी दल नेपाली कांग्रेसले संसद वैठक अवरोध गर्दै आएको छ ।
आफ्नो नाम मुछिएपछि छानविनको लागि गृहमन्त्री लामिछाने पनि तयार भएको बताइएको छ ।
