अनलाइन डबली
काठमाडौं । भ्लादिमिर पुटिनले पाँचौं पटक रुसको राष्ट्रपति पदको सपथ लिएका छन् ।
हालै भएको आम चुनाव जितेका पुटिन नै रुसको राष्ट्रपतिमा निर्वाचित भएका थिए । उनले क्रेमलिनमा पद तथा गोपनीयताको सपथ लिएका हुन् ।
सपथ ग्रहणपछि आयोजित समारोहलाई सम्बोधन गर्दै पुटिनले रुसको नेतृत्व गर्नु पवित्र कर्तव्य भएको बताए । उनले यो कठिन समयपछि रुस फेरि बलियो हुने बताएका छन् ।
सपथपछि पुटिनले रुस अन्य देशसँग सम्बन्ध विकास गर्न तयार रहेको बताए । रुसले हरेक खतरा र चुनौतीको उचित जवाफ दिन तयार रहेको पनि बताए ।
चुनावमा करिब ९० प्रतिशत मत प्राप्तका आधारमा पनि पुटिनको पाँचौं कार्यकाल झन् शक्तिशाली भएको छ ।
युक्रेनलगायत पश्चिमा देशहरुलाई हेर्ने पुटिनको नजरलाई रुसी जनताले अत्याधिक मतका साथ समर्थन गरेसँगै उनि थप शक्तिशाली भएको बताइएको छ ।
राष्ट्रपति पुटिनले आफूले पाँचौं पटक शपथ लिनुअघि युक्रेन सीमा क्षेत्रमा रहेका सेनालाई आणविक हतियारको अभ्यास गर्न निर्देशन दिएका थिए । यसले पनि युक्रेन मिसनलाई पूरा गर्न पुटिन झन् आक्रमक बन्ने देखिएको अन्तर्राष्ट्रिय समाचार संस्थाहरुले विश्लेषण गरेका छन् ।
