अनलाइन डबली
काठमाडौं । जनयुद्धको क्रममा मृत्यु भएका सुरक्षाकर्मीका परिवारले प्रधानमन्त्री प्रचण्डलाई भेटेर आफूहरुले टीआरसी विधेयकमा कुनै बाधा नगर्ने प्रतिवद्धता जाहेर गरेका छन् ।
मंगलबार भएको भेटका क्रममा पीडित परिवारले संसदमा विचाराधीन टीआरसी विधेयकमा कुनै बाधा नगर्ने प्रतिवद्धता पनि व्यक्त गरेका हुन् ।
टिआरसी विधेयकमा सुरक्षाकर्मीका परिवारका सम्भव भएसम्मका मागहरू सम्बोधन गर्न आग्रह गर्दै उनीहरूले सरकारले राज्यपक्ष र विद्रोहीबाट मारिएका दुवै पक्षलाई समान व्यवहार गरेका कारण आफूहरू विधेयकमा बाधक नबन्ने स्पष्ट गरे ।
प्रधानमन्त्रीसँगको भेटमा द्वन्द्वपीडित सुरक्षाकर्मी परिवारकी वरिष्ठ उपाध्यक्ष रिता कार्कीले युद्धको पीडा र मर्म प्रधानमन्त्रीलाई जति नजिकबाट अरू नेताहरूलाई बोध नहुने भन्दै द्वन्द्वपीडितका सबै माग सम्बोधन हुने अपेक्षा व्यक्त गरिन् ।
प्रधानमन्त्री प्रचण्डले सरकारले सरकार र विद्रोही दुवैतर्फबाट मारिएका परिवारलाई समान व्यवहार गरेको र भविश्यमा समेत कुनै प्रकारको भेदभाव नहुने स्पष्ट पारे ।
त्यस्तै, प्रधानमन्त्रीले पीडित परिवारका सुझावलाई टिआरसी विधेयकमा सम्भव राखेर परिमार्जन गर्ने बताएको सचिवालयले जनाएको छ ।
