अनलाइन डबली
काठमाडौं । आज अपराह्नबाट सुरु भएको खण्डग्रास चन्द्रग्रहण आइतबार विहानसम्म रहनेछ । दिउँसो ४ः १९ बजेबाट सुरु भएको चन्द्रग्रहण राति २ः३८ सम्म रहने नेपाल पञ्चाङ्ग निर्णायक विकास समितिले जनाएको छ ।
यो चन्द्रग्रहण २०८० मा लाग्ने एक मात्र ग्रहण भएको समितिले जनाएको छ ।
ग्रहणका बेलामा स्नान गरी शुद्ध भावले विभिन्न मन्त्रोच्चारण गर्नाले राम्रो हुने मानिन्छ । तर, विशेष कामना राखेर गरिने कर्म भने गर्नुनहुँने बताइन्छ ।
धर्मशास्त्रका ग्रन्थमा चन्द्रग्रहणको नौ घण्टाअघिदेखि सुतक लाग्ने उल्लेख गरिएकाले आज राती लाग्ने ग्रहणको दिउँसो ४ः१९ बजेदेखि बार्नुपर्ने हुन्छ । बाल, वृद्ध र बिरामी बाहेकले भोजन गर्न नहुने बताइएको छ । ग्रहणका बेला जप, स्नान,ध्यान, पाठलगायत कर्म गर्दा फलदायी हुने शास्त्रीय वचन छ ।
गत वर्ष कात्तिक ८ गते सूर्यग्रहण र २२ गते चन्द्रग्रहण लागेको थियो ।
ग्रहण लागेका बेला सकेसम्म तीर्थ स्थलमा नसके नजिकको नदी, ताल, तलाउ, पोखरी वा त्यो पनि सम्भव नभए घरमै स्नान गर्नुपर्ने निर्णयसिन्धु,कालमाधव, लगायतका धार्मिक ग्रन्थमा उल्लेख गरिएको पाइन्छ ।
त्यसैगरी चन्द्रग्रहणलाई खुला आँखाले हेर्न नहुने बताइएको छ । चश्मा वा गलास लगाएर हेर्न सकिने वैज्ञानिकहरुले जनाएका छन् ।
