अनलाइन डबली
काठमाडौं । आज हिन्दू नारीहरुले ऋषिपञ्चमी पर्व मनाइरहेका छन् । प्रत्येक वर्ष भाद्र शुक्ल पञ्चमीका दिनमा सप्तऋषिको पूजा गरी ऋषिपञ्चमी पर्व मनाइन्छ ।
धर्मशास्त्रीका अनुसार आज बिहान १० बजेर ४९ मिनेटमा चतुर्थी तिथि सकिएर पञ्चमी तिथि ऋसुरु हुने भएकाले ऋषिपञ्चमीका व्रतालुले सप्तऋषिको पूजा गर्नुपर्ने बताउँछन् ।
यो पर्वमा महिलाहरुले बिहानै उठेर नित्य कर्म गरी नजिकको नदी, खोला, ताल, तलैया र पोखरीमा गई तीन सय ६५ वटा दतिवनले दाँत माझ्ने, गाईको गोबर, माटो एवं खरानी लगाई स्नान गर्दछन् । स्नानपछि अत्रि, गौतम, भारद्वाज, जमदग्नि, वशिष्ठ, कश्यप र विश्वामित्र ऋषिको पूजा गरिन्छ ।
ऋषिपञ्चमीको दिन सप्त ऋषिको पूजा आराधना गर्नाले परिवारको कल्याण हुने धार्मिक विश्वास छ । यही विश्वासका साथ काठमाडौंको गौरीघाटमा स्नान र पूजा गर्नेहरु भेला भएका छन् ।
ऋषिपञ्चमीको अबसरमा काठमाडौंको टेकु, मूलपानी लगायत मुलुकभरका ऋषेश्वर मन्दिरमा पूजा गर्ने श्रद्धालु महिला भक्तजनको भीड लाग्ने गर्छ । त्यस्तै मन्दिर जान नसक्ने वा नगएर घरमै पनि सप्तऋषिको पूजा गरेर ऋषिपञ्चमी पर्व मनाउँछन् ।
