अनलाइन डबली
काठमाडौं । सन् २०२४ हुने चुनावमा पुनः राष्ट्रपतिको उम्मेदवार बन्ने डोनाल्ड ट्रम्पको योजनामाथि गम्भीर धक्का लागेको छ । पूर्वअमेरिकी राष्ट्रपति डोनल्ड ट्रम्पलाईको कम्पनी करछली र आर्थिक अपराधमा दोषी ठहरिएसँगै यो धक्का लागेको हो ।
न्यूयोर्कको एक अदालतले विवादित ट्रम्पको द ट्रम्प अर्गनाइजेसन १७ अभियोगमा दोषी ठहर गरेको छ । उक्त कम्पनीमाथि १७ अभियोग लगाइएका थिए । जसमा षड्यन्त्र, झुटा प्रतिवेदन र वर्षौँदेखि आफ्ना कार्यकारीका लागि करछलीका प्रकरण चलाएको कुरा समावेश थिए।
उक्त कम्पनीले दश वर्षभन्दा बढी समयदेखि ट्रम्पलाई अपारदर्शी ढङ्गले मुनाफा दिएकोमा दोषी पाइएको फैसालमा उल्लेख भएको बताइएको छ ।
अभियोजनकर्ताहरूले ट्रम्पले कार्यकारी पदमा हुँदा पनि कर छलीमा मन्जुरी दिएको स्पष्टसँग देखिएको आरोप लगाएका थिए। त्यस्तो अभियोगले ट्रम्पलाई आगामी चुनावमा उठ्न समेत नपाउने हुन सक्ने अन्तर्राष्ट्रिय संचारमाध्यमहरुले बताएका छन् ।
उक्त फैसला बदलाको नियतले भएको भन्दै ट्रम्पले पुनरावेदन गरिने बताएका छन् । उक्त फैसलाले आफू निराश भएको बताएको बीबीसीले समाचारमा उल्लेख गरेको छ ।
बीबीसीका अनुसार कर समावेश नगरिएका मुनाफामा विलासी कार र निजी विद्यालयका शुल्कहरू रहेको अभियोजनकर्ताहरूले बताएका छन्। उनीहरूको तलब कम तय गरिँदा त्यसले व्यवसायले तिर्नुपर्ने कर कम गर्छ।
उक्त कम्पनीले १६ लाख अमेरिकी डलर जरिबाना तिर्नुपर्ने हुनसक्ने बताइएको छ भने उसले भविष्यमा ऋण सुनिश्चित गर्न र लगानी गर्न समेत कठिनाइ सामना गर्न सक्छ।
