अनलाइन डबलीकाठमाडौँ । इजरायलले गाजा स्ट्रीपमा हवाई हमला गरेको छ । हमलाबाट प्यालेस्टिनी इस्लामिक जिहाद (पीआईजे) का एक कमाण्डरको मृत्यु भएको बीबीसीले जनाएको छ । त्यस्तै, इजरायली हमलामा परी उच्च कमाण्डरसहित कम्तिमा पनि १० जनाको ज्यान गएको छ । स्थानीय स्वास्थ्य अधिकारीहरूका अनुसार मृत्यु हुनेमध्ये एकजना बालिकासमेत छन् र अन्य दर्जनौँ घाइते भएका छन् ।
इजरायलका प्रधानमन्त्री याइर लापिडले हवाई हमला गरेको पुष्टि गर्दै तत्कालको जोखिम देखिएपछि उक्त कारबाही गरिएको बताएका छन् । एक हप्ता पहिले मात्रै पीआईजेका एकजना सदस्य पक्राउ परेका थिए । इजरायलका आन्तरिक मामिला मन्त्री आइलेट सखेदले विवाद बढेको भन्दै त्यो कहाँ पुग्छ कसैलाई जानकारी नभएको बताइन् । उनले लामो र कठिन हुन सक्ने बताइने ।
उता इजरायले पहिला पीआईजेले इजरेलतर्फ १०० भन्दा धेरै रकेटहरू प्रहार गरेको आरोप लगाएको छ । त्यसको जवाफमा हवाई हमला गर्नु परेको उसले दाबी गरेको छ । ती रकेटहरु इजरायलको आइरन डोम क्षेप्यास्त्र प्रतिरक्षा प्रणालीले पहिचान गर्दै निष्क्रिय पारेको समेत दाबी गरिएको छ । इजरायलको डिफेन्स फोर्स आईडीएफले त्यसपछि आफूले लडाकुहरूका स्थान पहिचान गर्दै हमलाहरू सुरु गरेको जनाएको छ ।
प्रधानमन्त्री लापिडले एक टेलिभिजन सम्बोधनमा आफ्नो देशले तत्काल हुनसक्ने जोखिमविरुद्ध एउटा सटिक ढङ्गको प्रतिआतङ्कवाद कारबाही गरेको बताएका छन् ।
आईडीएफले आफूले प्रहार गरेका ठाउँहरू पीआईजेसँग सम्बन्धित रहेको जनाएको छ । जसमा गाजा शहरको एउटा अग्लो भवन प्यालेस्टाइन टावर समेत परेको छ । बेलुनबाट आफ्नो भूमिमा हमला भएको भन्दै इजरेलद्वारा गाजामा हवाई आक्रमण
इजरायलले हमास विद्रोहीको क्षमता वर्षौँपछाडि धकेलिदिएको दाबी गरेको छ । हवाई हमलाबाट भएको ठूलो विस्फोटनले भवनबाट धूवाँको विशाल मुस्लो निस्किएको भिडियो अन्तर्राष्ट्रिय संचारमाध्यमहरुले सार्वजनिक गरेका छन् । तैसिर जबारीसहित चारजना पीआईजे लडाकुहरू र एकजना पाँच वर्षिय बालिका हमलामा परेर ज्यान गुमाउनेमध्ये रहेको स्थानीय स्वास्थ्य अधिकारीहरूले जनाएका छन्
इजरायली सेनाका एकजना प्रवक्ताले आईडीएफले झण्डै १५ जना लडाकुहरू मारिएको अनुमान गरेको जनाएको बीबीसीले जनाएको छ ।
इरान भ्रमणका क्रममा राजधानी तेहरानमा बोल्दै पीआईजेका महासचिव जयद अल–नखलाले इजरायलको हमलाको जवाफ दिने बताएका छन् । उनले भने, “यो उक्साहटका लागि हामी बलपूर्वक जवाफ दिनेछौँ, र त्यहाँ लडाइँ हुनेछ जसमा हाम्रा मानिसहरूले जित हासिल गर्नेछन् ।”
यसैबीच गाजा स्ट्रीपमा नियन्त्रण राख्ने हमासले लडाइमा सशस्त्र समूहहरू एकताबद्ध रहेको भन्दै चुप लागेर नबस्ने जनाएको छ । इरानको साथ पाएको पीआईजेको सिरियाको राजधानी दमास्कसमा मुख्यालय छ । र उक्त समूह गाजामा रहेको शक्तिशालीमध्येको लडाकु समूह हो ।
विगतदेखि नै उक्त समूह इजरेलविरूद्ध रकेट हमला, गोली हानाहान सहितका कैयौँ हमलामा जिम्मेवार पाइन्छ ।
रुस-युक्रेन, चीन-ताइवान, अजरबैजान-अर्मेनिया र इजरायल-प्यालेस्टाइनीको पछिल्लोमा द्वन्द्वले विश्वयुद्धको खतरा नजिकिँदै गएको रक्षाविज्ञहरुले बताएका छन् ।
