अनलाइन डबली
काठमाडौँ । डोनबास क्षेत्र कब्जामा लिएपछि रुसी सेना युक्रेनका राजधानी किभजनिक पुगेको छ । उत्तर पश्चिमतिरबाट अघि बढेको रुसी सेना क्षेप्यास्त्र हमला गर्दै अघि बढिरहेको छ । अन्तर्राष्ट्रिय संचारमाध्यमहरुका अनुसार रुसी सेनाले एकै पटक नयाँ संस्करणका अस्त्रसहित रुसी सेना किभतिर अघि बढेको थियो । आइतबार विहानदेखि रातिसम्म राजधानी किभ आसपास १४ वटा नयाँ संस्करणका क्षेप्यास्त्र प्रहार भएका छन् ।
हमलाबाट किभका केही भवनहरु ध्वस्त भएका छन् । र एक जनाको ज्यान गएको पुष्टि भएको छ । केही मानिसहरु भग्नाबशेषमा पुरिएको आशंका गरिएको अन्तर्राष्ट्रिय संचारमाध्यमहरुले समाचारमा उल्लेख गरेका छन् ।
रुसी रक्षा मन्त्रालयले आइतवार किभको उत्तरी चेर्निहाइभ र राजधानीको पश्चिममा रहेको झिटोमिर र ल्भिभ क्षेत्रमा रहेको युक्रेनी सेनाको तालिम केन्द्रहरूमा उच्च क्षमता भएका अस्त्रहरू प्रहार गरेको बताएको छ । यो क्रम जारी रहेन पनि रुसले बताएको छ ।
युक्रेनी सेनाले क्षेप्यास्त्र हमला भएको स्वीकार गर्दै टुपोलेभ बम्बर्समार्फत् करिब १,४५० किलोमिटर टाढा क्यास्पियन सागरबाट क्षेप्यास्त्र प्रहार भएको जनाएको छ । त्यस्तै, रुसी क्षेप्यास्त्रहरू रुसको मित्रराष्ट्र बेलारुसमा उड्ने टुपोलेभ्सबाट प्रहार गरिएको युक्रेनी सेनाले दाबी गरेको छ ।
‘जी सेभेन’ का शिखर सम्मेलन सुरु हुने अघि रुसले युक्रेनमा महला तेज बनाएको छ । सम्मेलनमा रुसबारे नयाँ प्रतिबन्धको घोषणा हुन सक्ने बताइएको छ । त्यस्तै, सम्मेलनले युक्रेनलाई थप सैन्य सहयोग उपलब्ध गराउने चर्चाबीच रुसले हमला तेज बनाएको हो ।
किएभका मेयर भिटाली क्लिट्स्कोले यी प्रहारहरू जी सेभेन सम्मेलन अघि युक्रेनलाई धम्क्याउने प्रयास स्वरूप भएको बताए । रुसले असअघि किभमा जुन ५ मा एक रेल मर्मत केन्द्रमा क्षेप्यास्त्र हमला भएको थियो ।
अमेरिकी राष्ट्रिपति जो बाइडनले जर्मन चान्सलर ओलाफ स्कोल्जलाई हामी एक हुनुपर्छ भनेको बताइएको छ । शिखर सम्मेलन सुरु हुनुअघि बाइडनले स्कोल्जलाई यो भन्नुलाई अर्थपूर्ण रुपमा हेरिएको छ । जी सेभेनमा युक्रेनलाई लिएर फरक फरक धारणा आउने पनि गरेका छन् । सम्मेलनले सबैको एउटै धारणा बनाएर अघि बढ्ने प्रयास गर्ने बताइएको छ ।
जी सेभेनका भित्रका देशहरुबीचको आन्तरिक अन्तरविरोध युक्रेन घटनापछि झन बढेर गएको छ । शिखर सम्मेलनमा रहेका बीबीसीका कूटनीतिक संवाददाता जेम्स ल्यान्डेल, पछिल्ला साताहरूमा युद्धमा पश्चिमी एकता खस्किएको बताउँछन् । उनका अनुसार केही नेताहरूले रुससँग दीर्घकालीन सम्बन्धबारे छलफल गरिरहेका छन् भने अन्य केहीले युक्रेनलाई बलियो र दिगो साथ दिनु पर्नेमा जोड गरेका छन् ।
त्यसैगरी रुसले अर्को हलमा गरेको ल्भिभको स्टारिची जिल्लामा भएको आक्रमण नेटो सदस्य राष्ट्र पोल्यान्डको सिमानाबाट ३० किलोमिटर मात्र पर थियो ।
किभमा हमला सुरु भएसँगै युक्रेनले फेरि लामो दूरीका अस्त्र ढुवानीमा तीव्रता दिन पश्चिमाहरूसँग आग्रह गरेको छ । बेलायतका प्रधानमन्त्री बोरिस जोनसनले जी सेभेन सम्मेलनमा फ्रान्सका राष्ट्रपति एमानुअल माँक्रोलाई भेटेका छन् । जोनसनका प्रवक्ताले द्वन्द्वको क्रममा महत्वपूर्ण क्षण आएको र युद्धमा छाल बदल्ने अवसर रहेको कुरामा उनीहरू सहमत भएको बताए ।
