काठमाडौँ । मुस्ताङको लो-घेकर दामोदरकुण्ड गाउँपालिकाको अध्यक्षमा नेकपा एमालेका लोप्साङ छोम्पेल विष्ट विजयी भएका छन्। विष्टले ६८९ मत पाएका छन्।
प्रतिस्पर्धी नेकपा एकीकृत समाजवादीका देव बहादुर गुरूङले १८५ मत पाएका छन्। यस्तै उपाध्यक्षमा पनि एमालेकी छिरिङ ल्हामो गुरूङ विजयी भएकी छिन्। उनले ६४१ मत पाइन्।
नेपाली कांग्रेसकी लक्ष्मी गुरुङले २२५ मत पाएर पराजित भएकी छिन्। २०७४ सालको चुनावमा विष्ट स्वतन्त्र उम्मेद्वार भएरै चुनाव जितेका थिए। पछि नेकपा (एमाले) प्रवेश गरेका हुन्।
उनले २०७४ को चुनावमा प्रतिस्पर्धी नेपाली कांग्रेसका तेन्जिङ छिरिङ गुरूङलाई ५ सय ५२ मतान्तरले हराएका थिए। निर्वाचन आयोगको तथ्यांकअनुसार विष्टले ७ सय ५५ र गुरुङले २ सय ३ मत पाएका थिए।
यस्तै चितवनमा भरतपुर महानगरबाहेकका पालिकामा अहिले मतगणना जारी छ। खैरहनी नगरपालिकामा कांग्रेसका मेयर उम्मेदवार अगाडि छन्।
१८७ मत गणना हुँदा कांग्रेस उम्मेदवार शशि खनियाँले ९३ मत पाएका छन् भने एमालेका लालमणि चौधरी ५९ मत पाएका छन्। राप्ती नगरपालिकामा र इच्छाकामना गाउँपालिकाको अध्यक्षमा एमाले उम्मेदवार अगाडि छन्।
राप्ती नगरपालिमा ३०० मत गणना हुँदा एमालेका गोविन्दप्रसाद कँडेल १५२, गठबन्धनका तर्फबाट उम्मेदवार बनेका एकीकृत समाजवादीका शमशेर लामाले १०३ मत पाएका छन्।
इच्छाकामनामा २०० मत गणना हुँदा एमालेका दानबहादुर गुरूङले ९४ र कांग्रेसकी गीता गुरूङले ८० मत पाएकी छन्। माडीमा ३५० गणना हुँदा माओवादी केन्द्रका ऋषि काफ्लेले १४३ र एमालेकी ताराकाजी कुमारी महतोले १२७ मत पाएकी छन्।
यी सबै पालिकामा मतगणना जारी छ। कालिका र रत्ननगर नगरपालिकामा पनि मतगणना सुरू भएको छ। भरतपुर महानगरको केहीबेरपछि मात्र मत गणना सुरू हुनेछ।
