काठमाडौँ । नेपाल बार एसोसिएसनको चुनावमा नेकपा (एमाले) निकट उम्मेदवार पछि परेका छन् । जारी मत गणनामा एमाले निकट वकिलहरुका उम्मेदवार ६ सय मतले पछि परेका छन् ।
पछिल्लो मत परिणामअनुसार सत्ता गठबन्धन दल निकट कानुन व्यवसायीका साँझा उम्मेदवार गोपालकृष्ण घिमिरे करिब ६ सय मतले अगाडि छन् । घिमिरे ११ सय मत ल्याउँदा प्रगतिशील समूहबाट उम्मेदवारी दिएका विष्णुमणि अधिकारीले ५ भन्दा बढी मत ल्याएको बताइएको छ । उनलाई एमालेको साथ रहेको छ ।
त्यसैगरी महासचिवका उम्मेदवार पनि गठबन्धनकै उम्मेदवार अगाडि छन् । अन्जिता खनालले ८३६ मत पाउँदा प्रगतिशील खेमाका केदारप्रसाद कोइरालाले ५५० मत पाएका छन् ।
मत गणनास्थलमा रहेका एक कानुन व्यवसायीका अनुसार अध्यक्षसहित सबै पदमा सत्ता गठबन्धन दलका उम्मेदवार अगाडि रहेका छन् ।
प्रदेश नम्बर १ को विराटनगरबाहेक अन्य सबै स्थानको मत गनि सकिएको छ भने प्रदेश नम्बर २ को राजविराजको मत गन्न बाँकी छ । त्यस्तै सर्वोच्च अदालत बारको ३६२ मत र ललितपुर बारको २ सय मत गनि सकिएको छ ।
एमाले निकट प्रगतिशील समूहको पकड रहेको पाटन बार र काठमाडौं जिल्ला बारको मत भने अझै गन्न बाँकी नै छ । बारको निर्वाचनमा करिब ७ हजार ४ सय मत खसको थियो । अध्यक्ष पदमा निर्वाचित हुन करिब ३ हजार ७ सय मत ल्याउनु जरुरी छ ।
