काठमाडौँ । विवादित एमसीसी टेबल नगरी प्रतिनिधिसभा बैठक फागुन ६ गतेसम्मका लागि स्थगित भएको छ । प्रमुख प्रतिपक्ष नेकपा एमालेको अवरोध सुरु भएको बैठक फागुन ६ गते दिउँसो १ बजे बस्नेगरी स्थगित गरिएको छ ।

सरकारले आजको बैठकमा एमसीसी तयारी गरेपनि नेकपा माओवादी केन्द्रको असहमति र आपत्तिका कारण पेश हुन सकेन । सभामुखले बैठक सुरु भएको जानकारी गराएलगत्तै एमाले सांसदहरुले नाराबाजीसहित रोस्ट्रम घेराउ गरेका थिए ।

एमालेको नाराबाजीबीच सभामुखले कार्यसूचीमा प्रवेश गराएका थिए । आजको बैठकमा कानुन, न्याय तथा संसदीय मामिला मन्त्री दिलेन्द्रप्रसाद बडूले थारु आयोगको तेस्रो वार्षिक प्रतिवेदन पेस गरेका थिए ।

त्यसैगरी कार्यसूचीमा राखिएको पूर्वसांसदहरू जगतबहादुर ताजपुरिया, लक्ष्मीदास मानन्धर र डा दमनसिंह थापाको निधनप्रति शोक प्रस्ताव बैठकले पारित गरेको थियो । आजको बैठकमा दुईवटा विषय मात्रै कार्यसूचीमा राखिएको थियो ।