काठमाडौं । केही दिन सफा भएको मौसम पुनः बदली भएको छ । मंगलबार रातिबाट पुनः बदली भएको थियो । विहीबार विहानबाट सुदूरपश्चिम र कर्णाली प्रदेशका हिमाली क्षेत्रमा हिमपात भइरहेको छ ।
मौसमविद् सजिना शाक्यले संचारमाध्यमहरुलाई दिएको जानकारीअनुसार सुदूरपश्चिम र कर्णाली प्रदेशकका उच्च पहाडी र हिमाली क्षेत्रमा हिमपात भइरहेको छ ।
पश्चिमी न्यून चापीय प्रणालीको प्रभावका कारण देशभरको मौसम बदली र हिमपात भएको हो ।
आज दिउँसो यी क्षेत्रमा पानी पर्ने सम्भावना रहेको छ । अन्य प्रदेशमा पनि पानी पर्ने सम्भावना छ । त्यसैगरी काठमाडौं उपत्यकामा आज बेलुका पानी पर्ने जल तथा मौसम पूर्वानुमान महाशाखाले जनाएको छ ।
त्यसैगरी लुम्बिनी, गण्डकी र वाग्मती प्रदेशका केही ठाउँमा मेघगर्जन र चट्याङ्ग समेत पर्ने अनुमान मौसमविद् शाक्यको छ । त्यस्तै, आज राति पनि देशका धेरै ठाउँमा पानी पर्ने अनुमान गरिएको छ । भोलि पनि देशभर वर्षा र हिमपातको सम्भावना छ ।
भोलि देशभरको मौसम सामान्यदेखि पूर्ण बद्ली भइ धेरै ठाउँमा पानी पर्ने महाशाखाले जनाएको छ । आइतबारबाट मौसम खुल्दै जाने महाशाखाले जनाएको छ ।