काठमाडौं । कलाकार सिताराम कट्टेल ‘धुर्मुस’ र कुञ्चना घिमिरे ‘सुन्तली’ विरुद्ध अख्तियार दुरुपयोग अनुसन्धान आयोगमा उजुरी परेको छ । चितवतस्थित किक्रेट रंगशाला निर्माणको नाममा उठेको चन्दा रकम हिनामिना गरेर अलपत्र पारेको भन्दै उजुरी परेको हो ।
धुर्मुस-सुन्तलीले रंगशाला निर्माणको लागि उठेको रकम अनिमितता गरेको भन्दै उजुरी दिने भरतपुरका क्रिकेट प्रशिक्षक अनिल अधिकारी हुन् । उनले आइतबार सत्यतथ्य छानविन गरी कारवाहीको माग गर्दै उजुरी दर्ता गरेका छन् ।
अख्तियारको दर्ता नम्बर सी–०२३५०३ नम्बरको उजुरीमा अधिकारीले नेपाल र विदेशमा रहेका नेपालीहरु र भरतपुर महानगरपालिकाबाट गरी ५७ करोड रुपैयाँ चन्दा उठेको को तर काम भने नगरेको आरोप छ । उजुरीमा केवल १४ प्रतिशत भौतिक संरचना मात्रै बनेको तर १७ करोड रुपैयाँ थप ऋण छ भनेर धुर्मुस-सुन्तलीको दाबी सत्य नभएको उल्लेख छ ।
उजुरीमा दुई अर्ब रुपैयाँको लागत अनुमान गरिएको परियोजनामा रकम उठेजति काम समेत नभएको दाबी गरिएको छ । धुर्मुस-सुन्तलीले उक्त रकम हिनामिना गरेको हुन सक्ने भन्दै दुबै जनालाई छानविनको दायरामा ल्याउने पर्ने माग गरिएको छ ।
रंगशाला सार्वजनिक संचरना भएको र निर्माणको लागि सरकारी बजेट पनि भएको भन्दै अख्तियारलाई छानविन गर्न माग गरिएको छ ।
निकै उत्साहित हुँदै निर्माण सुरु गरिएको रंगशाला निर्माणको लागि बजेट अभाव भएको भन्दै धुर्मुस-सुन्तल रुँदै मिडियामा समेत आएका थिए । उनीहरुले थप सहयोग जुटाउन उक्त अभिनय गरेका थिए ।
सुरुदेखि रंगशाला निर्माणको लागि कति सहयोग जुट्यो भन्ने कुरा पारदर्शी नभएको भन्दै धेरैले साँचो व्यक्त गरेका थिए । धुर्मुस-सुन्तलीले रंगशाला निर्माणको लागि कति रकम जुट्यो सार्वजनिक नगरेको भन्ने प्रश्न समेत उठेको थियो ।
