काठमाडौँ । नेकपा (माओवादी केन्द्र) को अध्यक्षमा फेरि प्रचण्डलाई निर्विरोध निर्वाचित भएका छन् । महाधिवेशनबाट २९९ मध्ये २३६ जना चयन गरेको केन्द्रीय समिति बैठकले प्रचण्डलाई पुनः अध्यक्षमा निर्वाचित गरेको हो ।
सोमबार ललितपुरको सानेपास्थित एक पाटीप्यालेसमा भएको बैठकले अन्य पदाधिकारी भने चयन गर्न सकेन । बैठकमा नारायणकाजी श्रेष्ठले अध्यक्षमा प्रचण्डलाई पुनः अध्यक्षका लागि प्रस्ताव गरेका थिए भने लगत्तै हलले प्रचण्डलाई सर्वसम्मत अध्यक्ष चयन गरेको घोषणा गरेको थियो ।
हिजै पदाधिकारीको टुंगो लगाउने भनिएपनि पहिलो बैठक स्थगित गरियो । अध्यक्षबाहेकका पदाधिकारीमा सहमति नजुटेपछि अध्यक्ष प्रचण्डले बैठक २५ गतेसम्मको लागि स्थगित गरे । मुख्यगरी महासचिवमा सहमति नजुटेको हो ।
महासचिवमा जनार्दन शर्मा, शक्ति बस्नेत र देव गुरुङले दाबी गरिरहेका छन् । बरु चुनावमा जाने तर कसैले छोड्न तयार नभएपछि सहमतिको लागि प्रचण्डले बैठक स्थगित गरेको बताइएको छ ।
अध्यक्ष प्रचण्डले नेता वर्षमान पुन छिटै नेपाल फिर्ता हुन लागेको जानकारी गराउँदै त्यतिबेलासम्मको लागि भन्दै बैठक स्थगित गरेका थिए । माओवादी नेताहरुका अनुसार २५ गतेको बैठकले पदाधिकारीसँगै मनोनय गर्न बाँकी ६३ जनाको पनि टुंगो लगाउने बताएका छन् ।
माओवादी केन्द्रले अध्यक्ष, उपाध्यक्ष, महासचिव, उमहासचिव, सचिवसहित १५ पदाधिकारी निर्वाचित गर्नेछ ।
