काठमाडौँ । साफ च्याम्पियनसिप फुटबलको फाइनल खेल आज हुँदैछ । साफ उपाधिको लागि नेपाल र भारतबीच खेल हुँदैछ । नेपाली समय अनुसार बेलुका पौने ९ बजे माल्दिभ्सको मालेमा रहेको राष्ट्रिय रङ्गशालामा खेल हुने भएको छ ।
सातौं पटक उपाधि जितेको भारत र पहिलो पटक फाइनलमा पुगेको नेपालबीच उपाधिको लागि यो खेल रोचक हुने भएको छ । उपाधिको लागि दुबै टीमले दाबी गरेका छन् ।
पाँच राष्ट्र सहभागी राउण्ड रोबिन लिगको आधारमा भएको प्रतियोगिताको शीर्ष स्थानमा रहेर भारतले फाइनल खेल्न लागेको हो भने नेपालले दोस्रो स्थानमा रहेर फाइनलमा स्थान सुरक्षित गरेको थियो ।
फाइनलमा पहिलो पटक पुगेको नेपाली टीमले उपाधि जितेर इतिहास रच्ने दाबी गरेको छ । भारतले पनि नेपाल कडा प्रतिस्पर्धी रहेको बताएको छ । तर, सातौं पटक उपाधि जितेको भारतलाई सामान्य अवस्थामा हराउन भने सकिने छैन ।
उपाधिको लागि नेपालले भारतसँग यस अघिको खेलमा गरेको गल्ती सुधार्नु पर्ने खेल विश्लेषकहरुले बताएका छन् । यस अघि समूह चरणको खेलमा नेपाल भारतसँग १–० गोल अन्तरले पराजित भएको थियो ।
नेपाली टीमका सहायक प्रशिक्षक किरण श्रेष्ठले फाइनल जितेर इतिहास रच्ने सुनौलो अवसर खेर जान नदिने बताएका छन् । उनले आजको खेल आफूहरुका लागि ठूलो भएको भन्दै ऐतिहासिक लक्ष्य प्राप्तिमा मात्र एक जित टाढा रहेको बताएका छन् । उनले आजको खेलमा समूह चरणमा भारतसँगको खेलमा गरेको गल्ती पनि सुधार्ने बताएका छन् ।
