काठमाडौँ । आजबाट कक्षा १२ को परीक्षा सुरु हुँदैछ । राष्ट्रिय परीक्षा बोर्डका अनुसार ३ लाख ७४ हजार ४ सय १३ विद्यार्थी सहभागी हुँदैछन् । परीक्षा विहान ११ बजेदेखि दिउँसो २ बजेसम्म चल्नेछ ।
विद्यार्थीहरुले आफूले पढेकै विद्यालयबाट परीक्षा दिन पाउने भएका छन् । कोरोनाका कारण पहिलेजस्तो फरक फरक विद्यालयमा परीक्षा केन्द्र तोकिएको छैन । कोरोना संक्रमित भएका विद्यार्थीहरुलाई पछि छुटै व्यवस्था गरेर पनि परीक्षामा सहभागी गराउने बोर्डका अध्यक्ष डा. चन्द्रमणि पौडेलले जानकारीँँ दिएका छन् ।
परीक्षाका लागि तयार पारिएका प्रश्नपत्र बिहान साढे १० बजेसम्ममा अनलाइन माध्यमबाट हरेक परीक्षा केन्द्रमा पठाइने बोर्डले जानकारी दिएको छ ।
यसअघि गएको जेठमा तय भएको परीक्षा साउन ३१ गतेदेखि सुरु गर्ने तयारी थियो । तर कोरोना जोखिमका कारण साउनमा पनि स्थगित भएको थियो ।
अनलाइनबाट परीक्षाको तयारी भएपनि संसदीय समितिले भौतिकरुपमै परीक्षा गर्न निर्देशन दिएको थियो ।
