अछाम । मेल्लेख गाउँपालिकाले आफ्नो प्रशासनिक भवन र अस्पतालको उद्घाटन गरेको छ । बिन्दाबासिनीमा रहेको गाउँपालिकाको प्रशासनिक भवन र गाउँपालिकाकै लागनी र संचालनमा आउने १५ शैय्याको अस्पतालको पनि सोमबार उद्घाटन गरेको हो ।
गाउँपालिका अध्यक्ष लोक बहादुर बोहराले प्रशासनिक भवन र अस्पतालको उद्घाटन गरेका छन् । अहिले विद्यालयको भवनबाट सेवा दिइरहेको र अब आफ्नै नयाँ भवनबाट सेवा दिने अध्यक्ष बोहराले बताए । नयाँ भवनबाटै सबै सेवा दिन सकिने हुँदा सेवाग्राहीलाई सहज हुने बोहराले बताए ।
त्यसैगरी गाउँपालिकाले १५ शैयाको अस्पतालको उद्घाटन पनि गरेको छ । अब नयाँ अस्पतालको भवनबाट पालिकाबासीलाई सेवा दिने गाउँपालिकाले जनाएको छ । दक्ष चिकित्सकसहित सेवा दिने भएको हुँदा उपचारकै लागि तराई झर्नु पर्ने बाध्यताबाट गाउँपालिका मुक्त भएको अध्यक्ष बोहराले बताए । त्यस्तै, अध्यक्ष बोहराले सूचना प्रविधि केन्द्रको पनि उद्घाटन गरेका छन् ।
उद्घाटन समारोहमा उपाध्यक्ष धन बहादुर शाह, वडा अध्यक्ष तथा जनप्रतिनिधि, विभिन्न राजनीतिक दल, संघसंगठनको उपस्थिति थियो ।
अछामका सबै स्थानीय तहमा सबैभन्दा आफ्नै प्रशासनिक भवन र अस्पताल बनाउने मेल्लेख पहिलो गाउँपालिका हो ।
नयाँ संरचना निर्माणसँगै गाउँपालिकाका सबै सूचना र कामकारवाहीलाई डिजिटल माध्यमबाट जानकारी दिइने अध्यक्ष बोहराले बताए । उनले नागरिक आफैले जानकारी लिन सक्ने समेत बताए ।
