काठमाडौँ । अफगानिस्तानमा फेरि तालिबानीले सत्ता हत्याउन सक्ने देखिएको अन्तर्राष्ट्रिय समाचार एजेन्सीहरुले बताएका छन् । अमेरिकी नेतृत्वको सेना फिर्ता भएसँगै तालिबानी देशका विभिन्न स्थानमा भिषण हमला गरी नियन्त्रणमा लिएका समाचार सार्वजनिक भइरहेका छन् ।
अफगानिस्तानबाट अमेरिकी नेतृत्वमा रहेको विदेशी सैनिकको फिर्ता प्रक्रिया बढेपछि तालिबान विद्रोहीले आफ्नो गतिविधिलाई देशभर बढाएको छ । अफगानिस्तानको सुरक्षा अवस्था नाजुक बन्दै गएको भन्दै अमेरिका र बेलायतले आफ्ना नागरिकलाई स्वादेश फिर्ता हुन आग्रह गरेका छन् । आफ्ना नागरिकलाई लक्षित गरी घटना घट्न सक्ने भन्दै दुबै देशले सरकारको भर नपरी स्वादेश फिर्ता हुन भनेका छन् ।
काबुलमा रहेको अमेरिकी राजदूतावासले तत्काल हवाई टिकट खरिद गर्न नसक्ने अवस्थामा रहेका आफ्ना नागरिकलाई ऋण उपलब्ध गराउने समेत जानकारी गराएको छ। अमेरिकाले आफ्ना नागरिकहरुलाई व्यापारिक उडानहरुबाट फर्कन र दूतावासले गर्ने आपत्कालीन उद्धारमा भर नपर्न आग्रह गरेको छ ।
यसैबीच तालिबानी समूहले निम्रोज प्रान्तको राजधानी जारञ्जमाथि नियन्त्रण कायम गरेको समाचार संस्थाहरुले जनाएका छन् । त्यसलाई सरकारी फौजका निम्ति ठूलो धक्काको रुपमा हेरिएको छ ।
दक्षिण–पश्चिमी अफगानिस्तानको त्यस सहर तालिबान लडाकुहरुको नियन्त्रणमा गएको पहिलो प्रान्तीय राजधानी बनेको छ । तालिबान लडाकु समूहको अबको निशानामा दक्षिणी सहरहरु कान्दहार र लस्कर गह रहेको देखिएको छ।
शुक्रवार ट्विटरमा एउटा पोस्ट गर्दै तालिबान लडाकुहरुले इरानी सीमासँग जोडिएको एउटा महत्त्वपूर्ण व्यापार केन्द्र जारञ्जमाथि कब्जा गरेको दाबी गरेका थिए ।
