काठमाडौं । काठमाडौं उपत्यकामा जारी निषेधाज्ञा खुकुलो बनाएर एक साता थपिएको छ । अब निजी सवारी सधानमा जोर विजोर प्रणालीमा लागु भएको छ ।
काठमाडौं, भक्तपुर र ललितपुर जिल्लाका प्रमुख जिल्ला अधिकारीको आइतबार बसेको बैठकले बार कोडका आधारमा पसलहरु खोल्न दिने निर्णय गरेको छ । बैठकले असार ११ गतेसम्म निषेधाज्ञा थप समेत गरेको छ ।
काठमाडौंका प्रमुख जिल्ला अधिकारी कालीप्रसाद पराजुलीका अनुसार भोलिबाट ट्याक्सी पनि जोर विजोर प्रणालीमा चल्न पाउनेछ । तर अरु सार्वजनिक सवारी साधन भने चलाउन पाइने छैन ।
अब बारका आधारमा व्यवसाय सञ्चालन गर्न पाइनेछ । बैठकले आइतबार, मंगलबार र बिहीबार सुनचाँदी, भाँडा, विद्युतीय, घरायसी सामान बिक्री गर्ने पसल सञ्चालन हुनेछन् । त्यस्तै, अटोमोबाइल र त्यसका पार्टपूर्जा पाइने पसल पनि खुल्नेछ ।
त्यसैगरी सोमबार, बुधबार र शुक्रबार सपिङ मल, खेलकुद सामग्री पसल, कपडा, जुत्ता पसल खोल्न दिने निर्णय भएको छ । यस्तै फेन्सी, कस्मेटिक, गिफ्ट र टेलरिङ खुल्नेछन् ।
बारका आधारमा खुल्ने पसल बिहान ११ देखि ४ बजेसम्म खोल्न दिने निर्णय बैठकले गरेको छ । त्यस्तै, खाद्यान्न, फलफूल र तरकारी पसलहरु अहिलेझैं हरेक दिन ११ बजेसम्म खुल्नेछन् ।
