काठमाडौं । कोरोना भाइरसको दोस्रो लहरबाट सबैभन्दा बढी प्रभावित भारतमा नयाँ लहर चल्न सक्ने बताइएको छ । भारतीय संचारमाध्यमहरका अनुसार भारतमा आउँदो अक्टोबरसम्ममा कोरोना भाइरसको तेस्रो लहर आउन सक्ने चेतावनी दिइएको छ ।
दोस्रो लहरको सङ्क्रमण केही नियन्त्रणमा आएका बेला स्वास्थ्य विज्ञले फेरि तेस्रो लहरको जोखिम रहेको चेतावनी दिएका हुन् । तर, कोरोना विरुद्धको खोपका कारण तेस्रो लहरको असर केही कम पर्ने अनुमान गरिएको छ । तेस्रो लहरमा बालबालिका र १८ वर्षभन्दा कम उमेर समूहकालाई जोखिम धेरै हुने अनुसन्धानले देखाएको छ ।
बालबालिकालाई हुन सक्ने जोखिम रोक्ने तयारी भइरहेको भारत सरकारले जनाएको छ । भारतमा संक्रमितको संख्या दुई लाख भन्दा माथि पुगेको थियो भने ज्यान गुमाउनेको दैनिक तीन हजारसम्म पुगेको थियो ।
तर, भारतमा शुक्रबार ६० हजार ८ सय नयाँ सङ्क्रमित भेटिएका छन् भने यही अवधिमा कोरोनाका कारण १२ सय ६९ जनाको ज्यान गएको छ ।
नेपालमा पनि संक्रमण घट्दो अवस्थामा पुगेको छ । दैनिक ९ हजारसम्म पुगेको संक्रमण अहिले दुई हजारमा झरेको छ ।
स्वास्थ्य तथा जनसंख्या मन्त्रालयका अनुसार शुक्रबार थप २ हजार ७६८ जनामा कोरोनाभाइरसको संक्रमण पुष्टि भएको थियो । १३ हजार ३७ जनाको परीक्षण गर्दा पीसीआर विधिबाट १९६३ तथा एन्टिजेन विधिबाट ८०५ जनामा संक्रमण पुष्टि भएको हो । शुक्रबारसम्म पीसीआर विधिबाट ६ लाख १७ हजार ९४७ तथा एन्टिजेन विधिबाट २४ हजार ८६१ जनामा संक्रमण पुष्टि भइसकेको छ ।
त्यसैगरी अहिले संक्रमितभन्दा निको हुने दर दोब्बर छ । शुक्रबार थप ४ हजार २० जना संक्रमणमुक्त भएको स्वास्थ्य तथा जनसंख्या मन्त्रालयले जनाएको छ । नेपालमा हालसम्म ५ लाख ४९ हजार ६८२ जना निको भइसकेका छन् । नेपालमा निको हुने दर ८९ प्रतिशत रहेको छ ।
नयाँ संक्रमितभन्दा निको हुने बढी रहेसँगै शुक्रबारसम्म सक्रिय संक्रमितको संख्या घटेर ५९ हजार ६२४ पुगेको थियो । यसमध्ये ५५ ३७५ जना होमआइसोलेनमा, ४ हजार २४९ संस्थागत आइसोलेसनमा, ८७२ जना आईसीयू तथा २४६ जना भेन्टिलेटरमा रहेका छन् ।
शुक्रबार थप ४४ जनाको ज्यान गएसँगै नेपालमा कोरोनाबाट ज्यान गुमाउनेको संख्या ८ हजार ६४१ पुगेको छ । कोरोनाको मृत्यु दर १.६ प्रतिशत रहेको स्वास्थ्य तथा जनसंख्या मन्त्रालयले जनाएको छ ।
