धनगढी । कोरोना संक्रमणबाट बुटवलमा ४ र धनगढीमा २ जनाको निधन भएको छ । बुटवलमा ८ घण्टामा ४ जनाको निधन भएको छ । लुम्बिनी प्रादेशिक अस्पतालको फिबर क्लिनिकमा रुपन्देहीका चारजना संक्रमितको ज्यान गएको हो । कोरोना विशेष अस्पतालमा बेड नपाएर फिबरमा भर्ना भएका तीनजना महिला र एक पुरुषको ज्यान गएको हो ।
बुटवल उपमहानगरपालिका–१२ का ४७ वर्षीय पुरुषमा वैशाख १५ गते कोरोना पोजेटिभ पुष्टि भइ सोही दिन अस्पताल भर्ना भएकामा मंगलबार राति १० बजे निधन भएको अस्पतालले जनाएको छ । यस्तै कन्चन
गाउँपालिका–४का २७ वर्षीया महिलामा वैशाख १९ गते कोरोना संक्रमण देखिएको र सोही दिन अस्पताल भर्ना भएकामा बुधबार बिहान ५.४५ बजे निधन भएको छ ।
कोरोना संक्रमण पुष्टि पछि भर्ना भएका बुटवल ९ का ५४ वर्षीया महिला वैशाख १८ गते कोरोना संक्रमण पुष्टि भइ सोही दिन अस्पताल भर्ना भएकोमा बुधबार बिहान ६.२२ मा निधन भएको अस्पतालले जनाएको छ । वैशाख १४ गते कोरोना संक्रमण पुष्टि भएकी तिलोत्तमा नगरपालिका–४ की ४० वर्षीया महिला २१ गते अस्पताल भर्ना भएकामा उपचारका क्रममा बुधबार बिहान ६.३८ मा निधन भएको अस्पतालले जानकारी दिएको छ ।त्यसैगरी धनगढीमा थप दुई जनाको ज्यान गएको छ ।
संक्रमण पुष्टिपछि उपचार गराइरहेका दुई जनाको बुधबार निधन भएको छ । जिल्ला प्रशासन कार्यालय कैलालीले सेती प्रादेशिक अस्पताल र धनगढीकै एक निजी अस्पतालमा उपचाररत संक्रमितको उपचारको निधन भएको बताएको छ ।
प्रशासन कार्यालयका सूचना अधिकारी शिवराज जोशीका अनुसार सेती अस्पतालको कोभिड अस्थायी अस्पतालमा उपचाररत धनगढी उपमहानगरपालिका– ८ बस्ने ५८ वर्षीय पुरुष र गौरी गंगानगरपालिका–१ बस्ने ३५ वर्षीय पुरुषको मंगलबार राति निधन भएको हो ।
कोरोना संक्रमण पुष्टि भएपछि दुबै जनालाई अस्पताल भर्ना गरेर उपचार थालिएको थियो ।
