News Portal

  • निषेधाज्ञा जारी गरिएका जिल्लाको संख्या ४२ पुग्यो, कोरोना संक्रमण कम भएन

    डबली संवाददाता२०७८ बैशाख २० गते
    १६८ पटक

    काठमाडौँ । कोरोना भाइरस संक्रमणलाई नियन्त्रण गर्न ४२ जिल्लामा निषेधाज्ञा जारी भएको छ । आजबाट बझाङ र बैतडीमा पनि निषेधाज्ञा जारी भएको छ । गृहमन्त्रालयका अनुसार ३१ जिल्लामा पूर्ण तथा ११ जिल्लामा निश्चित क्षेत्रमा निषेधाज्ञा लगाइएको छ ।

    कोरोना संक्रमणको हटस्पट बन्दै गएपछि काठमाडौं उपत्यकामा यही १६ गतेदेखि निषेधाज्ञा जारी भएको छ । गृह मन्त्रालयका अनुसार काठमाडौं, भक्तपुर, ललितपुर, बाँके, सुर्खेत, कास्की, कैलाली, पर्सा, दाङ, कञ्चनपुर, पाल्पा, चितवन, बर्दिया र रूपन्देहीमा जिल्लाभर निषेधाज्ञा छ । यसअघि ठाउँ विशेषमा निषेधाज्ञा गरिएको बर्दियामा आजदेखि आउँदो ३१ गतेसम्म पूर्ण रुपमा निषेधाज्ञा लागू भएको हो ।

    त्यसैगरी अर्घाखाँचीमा आज रातिदेखि निषेधाज्ञा लागू गरिएको छ । सल्यान, सुनसरी, जाजरकोट, रुकुम पश्चिम, डडेल्धुरा, झापा, गुल्मी, प्यूठान, उदयपुर, बझाङ, कपिलवस्तु, नुवाकोट, धनुषा, अर्घाखाँची, बैतडी र दैलेखमा पूर्णरूपमा जिल्लाभर निषेधाज्ञा लागू गरिएको छ । कास्कीमा निषेधाज्ञा भए पनि जोरबिजोर लगाइएको छ ।

    गृहका अनुसार कपिलवस्तु, धादिङ, नुवाकोट र धनुषामा भोलि बिहानदेखि तथा दैलेखमा भोलि रातिदेखि निषेधाज्ञा लागू हुने गृहमन्त्रालयले जनाएको छ । बाग्लुङ, दार्चुला, मोरङ, काभ्रे, गोरखा, बाजुरा, मकवानपुर, कालीकोट, स्याङ्जा, रामेछाप र ताप्लेजुङमा ठाउँ तोकेर आंशिक निषेधाज्ञा लगाइएको छ ।

    सरकारले कोरोना सङ्क्रमणको सङ्ख्या काठमाण्डौ उपत्यका तथा तराईमा पाँच सय र पहाडी जिल्लामा दुई सय पुगे निषेधाज्ञाको निर्णय गर्ने अधिकार सम्बन्धित जिल्लाका प्रमुख जिल्ला अधिकारीलाई दिएको छ ।

    प्रतिकृया दिनुहोस्