काठमाडौं । नेपालमा कोरोना भाइरसको दोस्रो लहर आउन सक्ने देखिएको छ । स्वास्थ्य तथा जनसंख्या मन्त्रालयले एक महिनाभित्र नेपालमा कोरोनाको दोस्रो लहर आउन सक्ने चेतावनी दिएको छ ।
भारतमा कोरोनाको दोस्रो लहर चलेको छ । भारतबाट खुला सीमाको दुरुपयोग गर्दै संक्रमित नेपाल प्रवेश गरिरहेको बताइएको छ । स्वास्थ्य तथा जनसंख्या मन्त्रालयले भारतबाट नेपाल आउनेलाई कोरोना परीक्षण गर्न समेत आग्रह गरेको छ ।
मन्त्रालयका प्रवक्ता डा. जागेश्वर गौतमले विज्ञप्ति जारी गरेर स्वास्थ्य मापदण्ड कामय गर्न र भिडभाडजन्य कार्य नगर्न आग्रह गरेका छन् । मन्त्रालयले सभा, जुलुस, र्याली, भेला, जमघट, गोष्ठी, सेमिनार, बैठक, भीडभाड हुने व्यवसायका कार्यहरु नगर्नका लागि अनुरोध गरेको छ ।
नेपालमा पनि पछिल्ला केही हप्तादेखि संक्रमित बढे पनि स्वास्थ्य मापदण्डको पालना भने विरलै हुने गरेको पाइएको छ । कोरोनाका संक्रमितहरु बढिरहँदासमेत सरकारबाटै स्वास्थ्य मापदण्डको ब्यापक उल्लंघन हुँदै आएको छ ।
पछिल्लो समयमा प्रधानमन्त्री केपी शर्मा ओलीसहित सबै पार्टीका नेताहरुले नै स्वास्थ्य मापदण्ड पूरा गर्न छोडेका छन् । उनीहरु दैनिक हजारौं जम्मा हुने कार्यक्रममा सहभागी हुँदै आएका छन् ।
भारतमा चलेको दोस्रो लहरपछि नेपालमा प्रवेश गरेकाहरुमा कोरोना संक्रमण पुष्टि भएको छ । यसमा सबैभन्दा बढी नेपाल भित्रिने सुदूरपश्चिम सबैभन्दा बढी जोखिम रहेको बताइएको छ । केही दिन पहिले मात्रै गड्डाचौकीबाट नेपाल भित्रिएका एकजनामा कोरोना संक्रमण पुष्टि भएको थियो । यसले कोरोनाको दोस्रो लहर नेपाल प्रवेश गर्ने चिन्ता बढाएको छ ।
यसैबीच नेपालमा आइतबार थप ७७ जनामा कोरोना संक्रमण पुष्टी भएको छ । त्यस्तै १०६ जना निको भएर सामान्य जीवनमा फर्किएका छन् । अहिले नेपालमा ९६९ जना मात्रै सक्रिय संक्रमित रहेको स्वास्थ्य तथा जनसंख्या मन्त्रालयले जानकारी दिएको छ । कोरोना संक्रमणबाट नेपालमा ३ हजार १६ जनाको ज्यान गएको छ । पछिल्लो केही दिन शून्य मृत्यु रहेको छ ।
