काठमाडौं । छुटाछुट्टै दुर्घटनामा ३ जनाको ज्यान गएको छ भने ४७ जना घाइते भएका छन् । बाँकेमा जन्ती बोकेको बस दुर्घटना हुँदा ३७ जना घाइते भएका छन् ।
प्रहरीका अनुसार बाँकेको राप्ती सोनारी गाउँपालिका-३ बैसामा शुक्रबार राति भएको दुर्घटनाका घाइतेमध्ये १ जनाको अवस्था गम्भीर रहेको छ । दुलही पुर्याउन हिडेको ना ३ ख ९७५९ नम्बरको बस शुक्रबार राति दुर्घटना हुँदा ३७ जना घाइते भएको बाँके प्रहरीले बताएको छ ।
राप्ती सोनारीबाटै दाङको देउखुरी दुलही पुर्याउन हिँडेको थियो । घाइते सबैको कोहोलपुर मेडिकल कलेजमा उपचार भइरहेको छ ।
यसैबीच मकवानपुरमा ट्रक र रात्रिबस एक आपसमा ठोक्किएका छन् । पूर्वपश्चिम राजमार्गअन्तर्गत मकवानपुरको मनहरी-६ सुनाचुरीमा भएको दुर्घटनाम परी ३ जनाको ज्यान गएको छ ।
शनिबार बिहान हेटौंडाबाट चितवनतर्फ जाँदै गरेको ना४ख ५१४९ नम्बरको बस र विपरीत दिसाबाट हेटौंडा आउँदै गरेको ना६ख८९ नम्बरको ट्रक एकआपसमा ठोक्किँदा अन्य १० जना घाइते भएका छन् ।
प्रहरीका अनुसार दुर्घटनामा बसका चालक वीरगञ्ज महानगरपालिका-१५ का ३५ वर्षीय मदनकुमार थापा, बसमा सवार भारत सिस्वाका अन्दाजी ४० वर्षीय अभयलाल कुश्वाह र बिहारका ४० वर्षीय सुनिलकुमारको ज्यान गएको हो ।
बस चालक थापा र सुनिल कुमारको उपचारको क्रममा चितवनस्थित पुरानो मेडिकल कलेजमा ज्यान गएको थियो । अन्य घाइते १० जनाको हेटौंडामा र भरतपुरमा उपचार भइरहेको प्रहरीले जनाएको छ ।
