काठमाडौं । शक्तिशाली भूकम्प गएसँगै सुनामी आएको छ । अन्तर्राष्ट्रिय संचारमाध्यमहरुका अनुसार दक्षिण प्रशान्त महासागरमा शक्तिशाली भूकम्प गएको हो ।

बुधबार साँझ ७.७ रेक्टरस्केलको भूकम्प गएको अमेरिकी भूवैज्ञानिक एजेन्सीले जनाएको छ । भूकम्पको केन्द्रविन्दु लोयल्टी द्वीप समूहबाट १० किलोमिटर दक्षिण पूर्वी गहिराइमा रहेको छ । भूकम्पको धक्का न्यूजील्याण्डदेखि इन्डोनेसियासम्म महसुस गरिएको बताइएको छ । भूकम्पले पुर्याएको क्षतिको विवरण आइसकेको छैन ।

यसैबीच अष्ट्रेलियाको मौसम एजेन्सीले दक्षिण प्रशान्त महासागरमा ७.७ म्याग्निच्युटको भूकम्प गएका कारण सुनामी आएको पुष्टि गरेको छ । व्यूरो अफ मेट्रोलोजी अष्ट्रेलियाले सुनामीबाट लर्ड होवे द्वीप जोखिममा रहेको चेतावनी दिएको छ । अमेरिकी सुनामी चेतावनी केन्द्रले भानुआटु र फिजीमा सुनामीको लहर १ देखि ३.३ फुट माथिसम्म आउनसक्ने चेतावनी दिएको छ ।