News Portal

  • सिनोफार्मको कोरोना खोपलाई चीनले दियो बिक्री गर्न अनुमति

    डबली संवाददाता२०७७ पुस १७ गते
    २८० पटक

    काठमाडौं । चीनले सिनोफार्म कम्पनीद्वारा विकास गरिएको कोभिड–१९ विरुद्धको खोपलाई अनुमति दिएको छ । ७९ प्रतिशत प्रभावकारी भएको दाबी गरिएको यो खोप सर्वसाधारणलाई लगाउन चीन सरकारले अनुमति दिएको हो ।

    चिनियाँ कम्पनी सिनोफार्मले विकास गरेको यो खोपलाई आपतकालिन प्रयोग भन्दै   ४५ लाख चिनियाँ नागरिकलाई खोप दिइसकिएको छ ।

    सिनोफार्मको खोपलाई अनुमति दिएसँगै एसियामा फैलिएको कोरोनाभाइरसको प्रभाव घटाउन यो खोप महत्वपूर्ण पाइला हुने चिनियाँ अधिकारीहरुले बताएका छन् । यसअघि नै सिनोफार्मद्वारा तयार पारिएको कोभिड विरुद्धको खोप आपतकालीन प्रयोग अन्तर्गत ४५ लाख चिनियाँ नागरिकलाई दिइसकिएको छ ।

    खोप दिइएकाहरुमा खासगरी स्वास्थ्यकर्मी र विदेशमा काम गर्न जाने चिनियाँ नागरिक रहेका चिनियाँ स्वास्थ्य अधिकारीहरुले जनाएका छन् । बुधबार मात्र सिनोफार्मले आफूले विकास गरेको खोप ७९ दशमलब ३४ प्रतिशत सफल रहेको घोषणा गरेको थियो ।

    पश्चिमा मुलुकका फर्मास्यूटिकल कम्पनीहरु फाइजर र मोडर्नाले विकास गरेका खोपहरु क्रमशः ९५ र ९४ प्रतिशत सफल रहेको दाबी गरिएको थियो । चिनियाँ स्वास्थ्य प्रशासनका उप आयुक्त चेन सिफीले सिनोफार्मको खोपलाई ‘सःशर्त’ अनुमति दिइएको जानकारी दिएको चिनियाँ संचाराध्यमहरुले बताएका छन् ।

    अब सिनोफार्मले यो खोपलाई बजारमा बिक्री गर्न पनि अनुमति पाएको छ । चीनको राष्ट्रिय स्वास्थ्य आयोगका उपमन्त्री झेङ यिछिनले सिनोफार्मका खोपहरु वृद्धवृद्धा र अरु जोखिममा परेका नागरिकलाई निःशुल्क प्रदान गरिने जानकारी दिए ।

    प्रतिकृया दिनुहोस्