काठमाडौं । नेपाल कम्युनिस्ट पार्टीले संखुवासभामा प्रहरीसँग दोहोरो भि डन्त नभएको बताएको छ । नेकपाका प्रवक्ता प्रकाण्डले विज्ञप्ति जारी गरेर आफ्नो पार्टीका नेता र कार्यकर्ताबीच भि डन्त नभएको र प्रहरीले पार्टी सेक्रेटरी युवराज राईको घरमा गएर कुटपिट गरेको भन्दै घोर निन्दा गरेका छन् ।
प्रवक्ता प्रकाण्डले आइतबार साँझ जारी गरेको विज्ञप्तिमा संखुवासभाको चैनपुर नपा-४ मैदानेमा पार्टीका जिल्ला सेक्रेटरी राईको घरमा गई प्रहरीले बहिनी चन्द्रकला राईलाई कुटपिट गरी ढाड भाँचेर अचेत अवस्थामा पुर्याएको भन्दै आक्रोश पनि व्यक्त गरेका छन् ।
प्रकाण्डद्वारा जारी प्रेस विज्ञप्तिमा भनिएको छ, ‘आज सङ्खुवासभा जिल्लाको चैनपुर नपा ४ मैदानेमा हाम्रो पार्टीका जिल्ला सेक्रेटरी युवराज राईको घरमा गई प्रहरी टोलीले सर्वसाधारण घरपरिवारमाथि कुटपिट गरेको घटनाप्रति हाम्रो पार्टीको गम्भीर ध्यानाकर्षण भएको छ ।
प्रहरीले जिल्ला सेक्रेटरी युवराज राईकी बहिनी भएकै कारणले चन्द्रकला राईलाई कुटपिट गरी ढाड भाँचेर अचेत अवस्थामा पुर्याएको छ । हाम्रो पार्टी यस किसिमको ज्यादतीपूर्ण कार्यको घोर निन्दा र भत्र्सना गर्दछ ।
साथै उक्त घटनालाई दोहोरो भिडन्त भएको दाबी र समाचारको पनि खण्डन गर्दछ । यसरी नक्कली भिडन्तको आवरणमा सर्वसाधारणमाथि दमन चलाउने कार्य असाध्यै निन्दनीय छ । विज्ञप्तिमा अगाडि भनिएको छ, ‘देशको वर्तमान संवेदनशील अवस्थाको गहन विश्लेषण र नयाँ नीति तर्जुमा गर्नेबारे अध्ययन भइरहेको स्थितिमा भएको यस घटनाले पार्टीलाई गम्भीर बनाएको छ ।
सुरक्षा निकायप्रति कुनै आक्रमणको नीति नरहेको अवस्थामा पनि परिस्थितिलाई उक्साउने, उत्तेजित बनाउने र दमन गर्ने नीति राज्यले कायम राखेमा सशक्त प्रतिरोध गरिने नेकपाले सम्बन्धित सबैमा जानकारी गराएको छ ।
