News Portal

सवारी साधनको जोर-बिजोर प्रणाली हट्यो

डबली संवाददाता२०७७ पुस २ गते
६१ पटक

काठमाडौं । सवारी साधनमा जारी जोर-बिजोर प्रणाली हटाइएको छ । शुक्रबारदेखि लागु हुने गरी काठमाडौं उपत्यकामा सार्वजनिक तथा निजी सवारीमा लगाइएको जोर-बिजोर प्रणाली हटाउने जिल्ला प्राशसन कार्यालय काठमाडौंले निर्णय गरेको छ ।

विहीबार बसेको सरकारोवाला निकाय र विभिन्न यातायात व्यवसायी र मजदुरका संघ संस्थाका प्रतिनिधिको बैठकले सार्वजनिक सवारीमा जोर-बिजोर कायम गर्दा झनै भीड बढेको भन्दै जोर बिजोर प्रणाली हटाइएको हो । अब शुक्रबारबाट सबै सार्वजनिक तथा निजी सवारी सडकमा गुड्न पाउनेछन् ।

काठमाडौंका प्रमुख जिल्ला अधिकारी कालीप्रसाद पराजुलीका अनुसार तोकिएको स्वास्थ्य मापदण्ड पालना गरेर सबै सार्वजनिक र निजी सवारी चल्न दिने निर्णय भएको छ । शहरमा बढेको यात्रुको चापलाई ध्यानमा राखेर शुक्रबारबाट लागू हुनेगरी जोर-बिजोर प्रणाली हटाउने निर्णय गरेको पराजुलीले बताए ।

यसअघि नै यातायात व्यवसायी र  यातायात मजदुर संगठनले शुक्रबारबाट जोरबिजार प्रणाली उल्लंघन गरेर सवारी चलाउने घोषणा गरेका थिए । व्यवसायीले जोरबिजोर तोड्ने पक्का भएपछि प्रशासनले बैठक बोलाएर सोहीअनुसार निर्णय गरेको छ ।

केही दिनदेखि काठमाडौंमा यात्रुहरुको चाप बढेकोले भिडभाड भएको र स्वास्थ्य मापदण्ड पनि उलंघन हुँदै गएको छ । जोरबिजोर हटाउने निर्णय सकारात्मक भएको व्यवसायी र यातायात मजदूर संगठनले प्रतिक्रिया दिएका छन् ।

प्रतिकृया दिनुहोस्