काठमाडौं । सत्तारुढ नेपाल कम्युनिस्ट पार्टी (नेकपा) को स्थायी समिति बैठक पुस १ गते बस्नेगरी स्थगित भएको छ । प्रधानमन्त्री निवास बालुवाटारमा बसेकाे आजको बैठकले पार्टीका केन्द्रीय सदस्य कमानसिंह लामाको निधनमा शोक प्रस्ताव पारित गर्दै स्थगित भएको थियो ।
अर्को बैठक पुस १ गते दिउँसो १ बजे बस्ने नेताहरुले बताएका छन् । आजको बैठकमा अध्यक्ष तथा प्रधानमन्त्री केपी शर्मा ओली पनि सहभागी थिए । बैठकमा सहभागी नहुने बताउँदै आएका ओली पनि बैठकमा सहभागी भएका थिए ।
त्यसैगरी आजको बैठकमा पार्टीका प्रवक्ता नारायणकाजी श्रेष्ठको विषयले पनि प्रवेश पाएको छ । कार्यकारी अध्यक्ष प्रचण्डले सामान्य विवादमा प्रवक्ता श्रेष्ठलाई मुछेर टिकाटिप्पणी भइरहेको भन्दै त्यस्तो प्रचारमा नलाग्न आग्रह गरेका थिए ।
प्रचण्डले लामोको निधनबाट शोकाकुल र दुःखित भएकोअवस्थामा लामा र हाइड्रोपावर प्रोजेक्टसँग सम्बन्धित सामान्य विवादमा पार्टी प्रवक्ताले मिल्नुस् भन्नेबाहेक अरु कुरा गरेको नपाएको बताएका थिए । प्रचण्डले श्रेष्ठको बचाउ गर्दा ओली भने मौन बसेका थिए ।
लामाको कोरोना सक्रमणबाट निधन भएपछि प्रवक्ता श्रेष्ठबीच कुरा भएको अडियो तथा भिडियो सार्वजनिक भएको थियो ।
