News Portal

आजबाट चिडियाखाना खुल्दै, अनलाइनबाटै टिकट लिन सकिने

डबली संवाददाता२०७७ मंसिर २५ गते
६९ पटक

काठमाडौं । कोरोना महामारीका बन्द चिडियाखान आजबाट खुल्दैछ । नेपालको एक मात्रै चिडियाखाना ललितपुरको जवालाखेलस्थित सदर चिडियाखाना आजबाट खुलाउन लागिएको हो । कोरोना भाइरस संक्रमण फैलिन सक्ने भन्दै गत चैत ७ गतेदेखि बन्द गरिएको थियो ।

कोभिड-१९ सङ्कट व्यवस्थापन केन्द्र (सिसीएमसी) को निर्णयपछि स्वास्थ्य सुरक्षाका आवश्यक मापदण्ड पालना गरी चिडियाखाना खुल्न लागेको व्यवस्थापन पक्षले जनाएको छ। चिडियाखाना व्यवस्थापन प्रमुख डा. चिरञ्जीवीप्रसाद पोखरेलका अनुसार चिडियाखानामा प्रवेशका लागि स्वास्थ्यका मापदण्ड तयार गरिएको छ । प्रवेश टिकटको डिजिटलाइजेसन गरिएको र अनलाइनमार्फत पनि लिन सकिने पोखरेल बताउँछन् ।

त्यसैगरी चिडियाखानामा प्रवेश गर्दा हरेक व्यक्तिले मास्क अनिवार्य लगाउनुपर्ने र प्रवेश क्षेत्रमा सेनिटाइजरको व्यवस्था गरिएको छ। भिडभाड व्यवस्थापन गर्न एकपटकमा बढीमा ७०० देखि ८०० व्यक्तिलाई मात्र प्रवेश दिने र त्यसपछि अवलोकर्ताको सङ्ख्या धेरै भएमा जति व्यक्ति अवलोकनपछि बाहिरिन्छन् त्यति नै सङ्ख्यामा मात्र नयाँ प्रवेश गर्न दिने व्यवस्था गरिएको छ।

यसैगरी चिडियाखानाभित्र बसेर खान र वन्यजन्तुलाई खुवाउन, छुन नपाउने, एक व्यक्ति बढीमा डेढ घण्टामात्र बस्न पाउने, बालबालिकालाई खेलाउन नपाउनेजस्ता मापदण्ड तयार गरिएको छ। यसअघि झैँ हरेक दिन बिहान १० देखि साँझ ५ बजेसम्म अवलोकनका लागि सञ्चालन हुनेगरी नै मापदण्ड तयार गरिएको छ। हाल चिडियाखानामा ११० प्रजातिका एक हजार ६८ वन्यजन्तु छन्।

अवलोकनका गर्न विदेशीका लागि ७५०, सार्क राष्ट्रका पाहुनाका लागि ५००, नेपालीलाई १५० र नेपाली विद्यार्थी तथा ज्येष्ठ नागरिकका लागि ९० शुल्क निर्धारण गरिएको छ। वार्षिक ११ लाख दर्शक अवलोकन गर्न आउने यहाँ प्रवेश शुल्कबाट नै वार्षिक १५ देखि १६ करोडसम्मको आर्थिक कारोवार हुने गरेको थियो। कोरोनाका कारण चिडियाखाना घुम्न आउनेमा कमी आउन सक्ने बताइएको  ।

तत्कालीन राणा प्रधानमन्त्री जुद्ध शमशेरद्वारा वि.सं.  १९८९ मा निजीरुपमा स्थापना गरिएको सदर चिडियाखाना वि.सं. २०११ देखिमात्र सर्वसाधारणलाई खुला गरिएको थियो। चिडियाखाना २०५२ सालदेखि राष्ट्रिय प्रकृति संरक्षण कोषद्वारा व्यवस्थापन गरिएको हो।

प्रतिकृया दिनुहोस्