काठमाडौं । नेपालमा कोरोना भाइरस संक्रमणमुक्त हुनेको संख्या २ लाख २८ हजार बढी पुगेको छ । पछिल्ला दिनमा संक्रमणदर भन्दा निको हुनेको संख्या बढी छ ।
स्वास्थ्य तथा जनसंख्या मन्त्रालयका अनुसार सोमबार दिउँसोसम्म देशभरका विभिन्न आइसोलेशन तथा अस्पताल र होम आइसोलेसन सेन्टरबाट थप १६ सय २८ जनालाई डिस्चार्ज गरिएको थियो । योसँगै नेपालमा कोरोना जित्नेको संख्या २ लाख २७ हजार ४३३ पुगेको मन्त्रालयले जनाएको छ ।
२ लाख २७ हजार ४३३ जनाले कोरोना जितेर सामान्य जीवनमा फर्किएका छन् । मंगलबार विहानसम्म कोरोनामुक्त भएर डिस्चार्ज हुनेको संख्या २ लाख २८ हजार नाघेको बताइएको छ । तर स्वास्थ्य मन्त्रालयले पुष्टि गर्न बाँकी छ ।
त्यसैगरी कोरोनाबाट गुमाउनेको संख्या १६ सय नाघेको छ । सोमबार थप २० जना संक्रमितको निधन भएको स्वास्थ्य तथा जनसंख्या मन्त्रालयले जानकारी दिएको छ । योसँगै नेपालमा कोरोनाबाट १ हजार ६१४ जनाको निधन भएको थियो । गएराति थप व्यक्तिको निधन भएको छ ।
सोमबार थप १ हजार १४ जनामा कोरोना भाइरस संक्रमण पुष्टि भएको थियो । स्वास्थ्य तथा जनसंख्या मन्त्रालयका अनुसार सोमबार ६ हजार २ सय २० जनाको परीक्षण गरिएको थियो । सोमबारसम्म नेपालमा संक्रमितको संख्या २ लाख ४१ हजार ९९५ पुगेको मन्त्रालयले जनाएको छ ।
पछिल्ला दिनमा लगातार कोरोना संक्रमित भन्दा निको हुनेको संख्या बढी छ । मन्त्रालयका अनुसार अब सोमबारसम्म देशभर सक्रिय संक्रमितको संख्या १२ हजार ९४८ जना रहेका छन् । सबैभन्दा धेरै काठमाडौंमा रहेको बताइएको छ ।
- फाइल फोटो
