काठमाडौं । नेपाल कम्युनिस्ट पार्टी (नेकपा) को स्थायी समिति बैठक सात दिनको लागि स्थगित भएको छ । आइतबार पार्टी कार्यालय धुम्बाराहीमा सुरु भएको बैठकमा दुबै अध्यक्षका प्रस्ताव वितरण गरिएको छ ।
अध्यक्ष तथा प्रधानमन्त्री केपी शर्मा ओली बैठकमा सहभागी नभएपनि उनको प्रस्ताव पनि वितरण गरिएको छ । गत कात्तिक २८ गते सचिवालय समितिमा प्रचण्डले पेश गरेको प्रस्ताव र मंसिर १३ गते ओलीले जवाफमा पेश गरेको दुबै प्रस्ताव बैठकमा वितरण गरिएको हो । स्थायी समिति सदस्यहरुलाई अध्ययनको लागि भन्दै बैठक ७ दिनसम्म स्थगित गरिएको छ ।
बैठकपछि प्रवक्ता नारायणकाजी श्रेष्ठले दुबै प्रस्ताव स्थायी समिति सदस्यलाई वितरण गरिएको जानकारी दिँदै अध्ययनको लागि ७ दिनको समय प्रदान गरिएको बताए ।
प्रवक्ता श्रेष्ठका अनुसार अर्को बैठक मंसिर २८ गते बोलाइएको छ ।
बैठकमा सहभागी नभएर ओलीले अर्को प्रस्ताव लेखेको बताइएको छ । ओलीले प्रचण्डको प्रस्तावमाथि छलफल गर्न नसकिने भएकोले बैठकमा सहभागी नभएको आफू निकट नेताहरुलाई बताएका छन् ।
