काठमाडौं । सत्तारुढ (नेकपा)को सचिवाय बैठक आज पनि बस्दैछ । आजको बैठकमा उपस्थित नहुने ओलीले हिजै जानकारी दिएर निस्किएका थिए । बैठकमा पेश भएका दुबै प्रस्तावमाथि छलफल हुनुपर्ने प्रचण्डसहितका नेताहरुले अडान राखेपछि ओली बाहिरएका थिए ।
स्रोतका अनुसार बुधबार विहानै ओलीले महासचिव विष्णु पौडेललाई जानकारी गराएका छन् । ओलीले नआउने बताएपछि आज दिउँसो बस्ने भनिएको बैठकबारे अन्योलता थपिएको छ । विहान ९ बजेसम्म महासचिव पौडेलले बैठकबारे सचिवालयका सदस्यलाई कुनै खबर गरेका छैनन् ।
महासचिव पौडेल र सचिवालय सदस्य इश्वर पोखरेल ओलीलाई बैठकमा उपस्थित हुनुपर्ने भन्दै छलफल गरिरहेका छन् । पोखरेलले बैठकमा सहभागी नहुँदा अनर्थ लाग्ने भन्दै ओलीलाई बैठकमा सहभागी हुन आग्रह गरेको एक नेताले बताए ।
मंगलबारको बैठकमा ओली र प्रचण्डबीच बाझाबाझ भएको थियो । ओलीले प्रचण्डले पेश गरेको प्रस्ताव माफी मागेर फिर्ता लिनुस् भनेपछि विवाद बढेको थियो । बैठक सुरु भएपछि प्रचण्डले दुबै प्रस्तावमा छलफल गरेर निष्कर्षमा पुग्नु पर्ने बताएलगत्तै ओलीले खण्डन गर्दै त्यस्ता प्रस्तावमाथि छलफल गरे पार्टीका साख गिर्ने बताएका थिए ।
ओलीले प्रचण्डको प्रस्ताव आरोपपत्र मात्रै भएकोले छलफल गर्न सकिने बताउँदै माफी मागेर फिर्ता लिनु पर्ने बताएका थिए । त्यसपछि महासचिव बाहेक सबै नेताले ओलीको आलोचना गरेका थिए ।
नतेाहरु आजको बैठकमा कार्तिक २८ गते पेश गरेको प्रचण्डको प्रस्ताव र मंसिर १३ मा ओलीले पेश गरेका प्रतिवेदनमाथि छलफल गर्नुपर्ने धारणा राखेपछि ओली बैठकमा आउन नचाहेको बताइएको छ । ओलीले हिजो नै बैठक स्थगित गरेर अनौपचारिक छलफलमा सहमित खोजिनु पर्ने बताएका थिए । तर अन्य नेताहरुले बैठक छल्न खोजेको भन्दै दुबै सँगसँगै अगाडि बढाउनु पर्ने धारणा राखेका थिए ।
आज दिउँसो १ बजेको लागि बैठक बोलाइएको छ । बैठक प्रधानमन्त्री निवास बालुवाटारमै बोलाइएको छ । ओली पक्षीय नेताहरुले बैठकमा गएरै आफ्ना कुरा राख्न आग्रह गरिरहेका छन् । आज विहान आफू निकट नेताहरुसँग ओलीले छलफल गर्न लागेका छन् ।
