काठमाडौं । सत्तारुढ नेपाल कम्युनिस्ट पार्टी (नेकपा)को सचिवालय बैठक पार्टी कार्यालय धुम्बाराहीमा बस्न सकेन । सुरक्षा थ्रेट भन्दै आज बस्ने बैठक पनि बालुवाटारमै सुरु भएको छ ।
यसअघि शनिबार बसेको बैठकले तीन स्थगित गर्दै अर्को बैठक पार्टी कार्यालय, धुम्बाराहीमा बस्ने निर्णय गरेको थियो । पार्टी कार्यालयमा बैठक बस्न नसक्ने भन्दै महासचिव विष्णु पौडेलले सचिवालय सदस्यहरुलाई बालुवाटारमा आउन भनेका थिए । पौडेलले मंगलबार विहान सुरक्षा थ्रेट बढेको भन्दै बैठक बालुवाटारमै बस्ने जानकारी गराएका थिए ।
सुरक्षा थ्रेट नबढेको र प्रधानमन्त्री ओली धुम्बाराही जान तयार नभएको एक सचिवालय सदस्यले बताए ।
आज बस्ने बैठकमा प्रचण्डले पूरक प्रस्ताव पेश गर्ने तयारी गरेका छन् । ओलीले लगाएका आरोपको जवाफ दिँदै पूरक प्रस्ताव ल्याउन लागेको बताइएको छ ।
यसअघि प्रचण्डले पेश गरेको प्रस्तावको दोब्बर लामो प्रस्ताव ओलीले पेश गरेका थिए । ओलीको प्रस्ताव अध्ययनको लागि भन्दै तीन दिनको समय छुट्याइएको थियो । ओलीले गम्भीर आरोप लगाएको भन्दै प्रचण्डले त्यसको जवाफ लिखित रुपमै दिने अन्य सचिवालय सदस्यलाई सोमबार नै गराइसकेका थिए ।
मंसिर १८ गते पार्टीको स्थायी कमिटी र केन्द्रीय कमिटी बैठकमा प्रचण्डले पूरक प्रस्ताव पनि पेश गर्ने उनी निकट नेताहरु बताउँछन् ।
- फाइल फोटो
