काठमाडौं । क्रिसमस पर्वलाई मध्यनजर गर्दै भोलिबाट बेलायतमा जारी लकडाउन अन्त्य हुँदैछ । क्रिसमस पर्वलाई मध्यनजर गर्दै कोरोना सङ्क्रमण जोखिम रोक्न लामो समयदेखि जारी लकडाउन हटाउने प्रधानमन्त्री बोरिस जोन्सनले बताए ।
अन्तर्राष्ट्रिय सञ्चारमाध्यमका अनुसार बेलायत सरकारले डिसेम्बर २ अर्थात् भोलिदेखि राष्ट्रिय लकडाउन अन्त्य गरी जोखिम र सङ्क्रमण वृद्धिका आधारमा क्षेत्रगत प्रतिबन्ध लागू गर्ने तयारी गरेको छ ।
प्रधानमन्त्री जोन्सनले लकडाउन हटाउने अघिल्लो हप्ता बेलायती प्रधानमन्त्री कोभिड विन्टर प्लान’ को घोषणा गरेका थिए । तर सङ्क्रमणको स्तरका आधारमा अति उच्च, उच्च र मध्यम गरी तीन तहमा विभाजन गरी प्रतिबन्ध भने लागू गरिनेछ ।
त्यसैगरी अहिले बन्द रहेका व्यवसाय, रेष्टुरेन्ट, जीमखाना लगायत सञ्चालन हुने भएका छन् । बेलायतले क्रिसमस पर्वका बेला लकडाउन खुकुलो बनाउन लागेको हो । कोभिड-१९ को सङ्क्रमण फैलिने क्रम बढेसँगै बेलायत सरकारले गएको नोभेम्बर ५ देखि डिसेम्बर २ अर्थात् भोलिसम्मका लागि राष्ट्रिय लकडाउन गरेको थियो ।
यसअघि सरकारले मार्च अन्तिम हप्तादेखि पहिलो पटक झन्डै तीन महिनासम्म लकडाउन गरेको थियो । बेलायतमा झण्डै १६ लाख २९ हजारमा कोरोना सङ्क्रमण पुष्टि भएको छ । त्यहाँ ५८ हजारभन्दा धेरैको ज्यान गएको छ ।
