काठमाडौं । काठमाडौंमा राजावादीहरुले विरोध र्याली निकालेका छन् । केही दिनदेखि देशका विभिन्न सहरमा राजतन्त्र र हिन्दू राज्यको माग गर्दै प्रदर्शन गरिरहेका राजावादीहरुले सोमबार संघीय राजधानी काठमाडौं प्रदर्शन गरेका छन् ।
काठमाडौंको माइतिघरबाट सुरु भएको राजावादीको र्याली वानेश्वारतिर गएको छ । गणतन्त्र, संघीयता र धर्मनिरपेक्षताविरुद्ध राजावादीहरुले चर्का नारा लगाइरहेका छन् । विभिन्न संगठन र समूहका ब्यानरसहित राजावादीहरु सडकमा निस्किएका हुन् । उनीहरुले राष्ट्रिय झण्डा समेत बोकेका छन् ।
प्रदर्शनमा सहभागी राजावादीहरुले ‘गणतन्त्र धोका हो, संघीयता चाहिँदैन, राजतन्त्र जिन्दावाद, गल्लीगल्लीमा हल्ला छ, राजा आउने सल्लाह छ…’जस्ता नारा लगाइरहेका छन् ।
केही पहिले पोखरामा ठूलो प्रदर्शन गरेका राजावादीहरुले आइतबार हेटौडामा समेत राजतन्त्रको माग गर्दै प्रदर्शन गरेका थिए ।
