News Portal

  • उदाउँदो सूर्यलाई अर्घ्य दिएसँगै छठ सकियो

    डबली संवाददाता२०७७ मंसिर ६ गते
    ४६६ पटक

    काठमाडौं । कोरोना महामारीबीच विधि पुर्याएर छठ पर्व समापन गरिएको छ । शनिबार विहान उदाउँदो सूर्यलाई अर्घ दिएसँगै छठपर्व विधिपूर्वक समापन भएको हो । घर आगनमा जलाशय नबनाएकाहरुले जलाशयमा नै पुगेर सामूहिक रुपमा नै छठ पर्व मनाएका छन् ।

    कोरोनाका कारण केही ठाउँमा घरमै पानीको बनाएका जलाशयमा उदाउँदो सूर्यलाई अर्घ दिइएको छ । त्यस्तै, अन्य घरमा जलासय नबनाएका ठाउँमा दूरी कायम गर्दै बिहानै विभिन्न पोखरी, नदी, इनारलगायतको पानीको स्रोत भएको ठाउँबाट व्रतालुले सूर्यलाई अर्घ्य दिएका छन् ।

    माटोको घैला, दियो, ढकनी, सर्वी, हात्ती, पानालगायतका सामग्रीसहित बाँसको कोनिया, ढक्की, नाङ्लोमा केरा, ठकुवा, भुसवा, खजुरीलगायतका परिकार राखेर जलाशयमा शरीर डुबाउँदै उदाउँदो सूर्यलाई  अर्घ्य दिने गरिन्छ ।

    हिजो अस्ताउँदो सूर्यलाई अर्घ्य दिएपछि राति जलाशय, नदी, तलाउ–किनारमा अर्घ्य दिइएका सामग्रीहरू कतिपयले घरमै ल्याएर फेरि आज  बिहान झिसमिसमै घाटमा पुर्याउने गर्छन् भने कतिपयले त्यहीँ राखेर रातभर नाचगान र रमाइलो गर्छन् । आज कात्तिक शुक्ल सप्तमी तिथिका दिन उदाउँदो सूर्यलाई अर्घ्य दिएपछि छठ पूजा समापन भएको मानिन्छ ।

    कात्तिक शुक्ल षष्ठीको बेलुका अस्ताउँदो र सप्तमीको बिहान उदाउँदो सूर्यलाई अर्घ्यसहित गरिने छठ पूजाले निरोगी हुने, छालाजन्य रोगव्याधि नलाग्ने धार्मिक मान्यता रहेको छ । चार दिनसम्म मनाइने लोकपर्व छठ यसपालि पोहोर परारको भन्दा फरक देखियो ।

    कोरोना महामारीका कारण यसपालि पोहोर परारको जस्तो रौनक नभए पनि व्रतालुले विधि पूर्वक पूजा आराधना गरेका छन् । सहरी क्षेत्रमा सामूहिक रुपमा छठ मनाउनेहरुले केही स्वास्थ्य सुरक्षाका मापदण्ड पालना गरे पनि ग्रामिण क्षेत्रमा मापदण्ड पालना भएको छैन ।

    तराईका केही नदी, पोखरी, तलाउमा भने सामान्य अवस्थामा झैँ भीडभाड भएपछि प्रहरी परिचालन गरिएको थियो । कोरोनाको जोखिमका कारण यसपालि सरकारले भीडभाड नगरि पर्व मनाउन आग्रह गरेको थियो ।

    प्रतिकृया दिनुहोस्