काठमाडौं । आज छठ पर्वको मुख्य दिन । प्रत्येक वर्ष कार्तिक शुक्ल षष्ठीका दिन मनाइने छठको मुख्य दिन शुक्रबार साँझ अस्ताउँदो सूर्यलाई पूजा आराधना गरी अर्घ दिएर मनाइँदैछ ।
चार दिनसम्म चल्ने छठ भोलि विहान उदाउँदो सूर्यलाई अर्घ दिएर समापन गरिँदैछ । कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व बुधबारदेखि शुरु भएको थियो ।
सूर्य पुराणअनुसार सर्वप्रथम अत्रिमुनिकी पत्नी अनुसूयाले छठ व्रत गरेर अटल सौभाग्य र पतिप्रेम प्राप्त गरिन् भन्ने विश्वासका साथ ‘छठ पर्व’ मनाउने गरिन्छ । त्यस्तै, छठ पर्वमा व्रत गरे दुःख र दरिद्रताबाट मुक्ति पाइन्छ भन्ने जनविश्वास छ ।
विशेषगरी मिधिलाबासीले छठलाई विशेष रुपमा मनाउँदै आएका छन् । यसमा झुप्पा–झुप्पा फलहरू चढाउँदा सूर्य देवता प्रसन्न भई व्रतालुका कुटुम्बसहित सबै सन्तानको भलो हुन्छ भन्ने मान्यता रहेको छ । यस पर्वमा जो व्रत बस्न सक्दैन उसले अर्को व्रत गर्नेबाट व्रत गराउने गर्छन् । ऋण गरेरै भएपनि छठ पर्व मनाउने गर्छन् ।
कोरोना भाइरस संक्रमण हुन सक्ने भएकोले सरकारले भिडभाड नगर्न र घरमै बसेर छठ मनाउन आग्रह गरेको छ । तराई-मधेसमा यस वर्ष विगतका जस्तो रमझम भएन ।
छठको अबसरमा सरकारले आज सार्वजनिक बिदा दिएको छ ।
