काठमाडौं । सत्तारुढ नेपाल कम्युनिष्ट पार्टी (नेकपा) भित्र पूर्वएमाले समूह सक्रिय बनाइएको छ । पूर्वका कार्यकर्ताको जुम मिटिङ गरेको एक हप्ता नपुग्दै काठमाडौँमा भेला सम्पन्न भएको छ । पूर्वका कार्यकर्तालाई अध्यक्ष तथा प्रधानमन्त्रीले जुम सम्बोधन गर्दै जबजबारे बहस अगाडि बढाउन निर्देशन दिएर पार्टी एकता विरोधी गतिविधि गरेको आरोप लागिरहेको बेला काठमाडौँमा पनि भेला आयोजना गरियो ।
शनिबार काठमाडौंका अध्यक्ष कृष्ण राईकै संयोजनामा पूर्वएमाले नेताहरुको भेला सम्पन्न भएको छ । भेलामा काठमाडौँमा कार्यरत ओली पक्षीय पूर्वएमालेका नेताहरु सहभागी भएको थिए । उक्त भेलालाई सचिवालय सदस्य तथा उपप्रधानमन्त्री ईश्वर पोखरेलले सम्बोधन गरेका थिए ।
पार्टीभित्रको विवादको वास्तविकता बुझ्न अनौपचारिक भेला राखिएको अध्यक्ष राईले संचारकर्मीसँग बताएका छन् । भेलामा बरिष्ठ नेता माधवकुमार नेपाल पक्षका नेताहरु भने अनुपस्थित थिए ।
बालुवाटार स्रोतका अनुसार प्रधानमन्त्री ओलीले पूर्वएमालेहरुलाई एकजुट बनाउन खोजेका छन् । त्यसमा नेता नेपाल पक्षलाई पनि सहमत गराउने प्रयास गरिरहेका छन् । नेता नेपाल र ओलीलाई मिलाउन पूर्वएमालेका नेताहरुले दौडधुप जारी राखेका छन् । केही दिन पहिला आफ्ना सल्लाहकारको टोली नेता प्रदिप नेपालको घरमा पठाएका थिए । टोलीले नेता नेपाल र ओलीलाई मिलाइदिन आग्रह गरेका थिए ।
यसबैची ओलीले पूर्वएमालेका चार जना प्रभावशाली नेताहरुलाई आइतबार बालुवाटार बोलाएर छलफल गरेका छन् । छलफलमा वरिष्ठ नेता नेपाल, स्थायी कमिटी सदस्यहरु भीम रावल, सुरेन्द्र पाण्डे र रघुजी पन्त सहभागी थिए । उनीहरु सबै नेपाल समूहकै हुन् ।
अध्यक्ष प्रचण्डसहित सचिवालय समितिका ५ जना सदस्यले बैठक बोलाउन लिखित पत्र दिएपछि ओलीले सक्रियता बढाएका छन् । शनिबार साँझ एक अन्तरवार्तामा ओलीले पार्टीलाई फुट्न नदिने बताएका थिए ।
