काठमाडौं । भारतले नेपालसँग जोडिएका सीमा नाका खुला गरेको छ । कोरोना महामारीसँगै बन्द रहेका सीमा भारतले एकतर्फी रुपमा खुला गरेको छ । योसँगै भारतबाट कोरोना संक्रमित नेपाल प्रवेश गर्न सक्ने र संक्रमण झनै फैलिने भएको छ ।
सीमा खुला भएसँगै भारतीयहरु नेपाल प्रवेश गर्न प्रयास गर्न थालेका छन् । नेपालको कमजोर सीमा सुरक्षाले भारतीय प्रवेशलाई रोक्ने चुनौती भएको छ । सीमा बन्द हुँदै त भारतीयहरु नेपाली सुरक्षाकर्मीमाथि आ क्रमण गर्दै नेपाल प्रवेश गर्ने प्रयास गरेका दर्जनौं घटना छन् ।
भारतले सीमा खुला गरेसँगै वीरगञ्जलगायत भारतसँग जोडिएका सीमा नाकाबाट भारतीयहरु नेपाल प्रवेश गर्न थालिसकेको स्थानीयले बताएका छन् । उनीहरुलाई रोक्न सुरक्षाकर्मीहरुलाई हैरानी भएको छ । भारतीय गृह मन्त्रालयले औपचारिक रूपमै नाका खुला गरेको छ ।
नेपालले भने नाका खुला नगरेको कारण नेपाली नागरिकले मात्रै ओहोरदोहोर गर्न पाउने भएपनि भारतीयहरु जबरजस्त नेपाल प्रवेश गरिरहेका छन् ।
भारत कोरोना संक्रमणको बढी प्रभावितमा विश्वकै दोस्रो स्थानमा छ । अमेरिका पछि धेरै भारतमा संक्रमित रहेका छन् । दिनदिनै संक्रमणको संख्या पनि दैनिक ४० हजार भन्दा कमी आएको छैन ।
नेपालमा पनि पछिल्ला दिनमा संक्रमित र ज्यान गुमाउनेको संख्यामा कमी आएको छैन । सरकारले सशुल्क बनाएसँगै पीसीआर परीक्षणमा कमी आएको छ ।
यसैबीच सोमबार विहानै चितवनमा मात्रै थप पाँच जनाको कोरोना संक्रमणबाट ज्यान गइसकेको छ । चितवन मेडिकल कलेजमा एकैदिन तीनजना र भरतपुर अस्पतालमा दुई जना कोरोना संक्रमितको निधन भएको छ । ज्यान गुमाउनेमा चितवन, धादिङ र एक जना नवलपुरका छन् ।
भरतपुर महानगरपालिका ४ का ६३ वर्षीय पुरुषको निधन भएको छ । श्वासप्रश्वासमा समस्या भई कात्तिक १२ गते भर्ना भएका उनको उपचारको क्रममा गएराति निधन भएको हो । त्यसैगरी कात्तिक १३ गते कोरोना संक्रमण पुष्टि भएका भरतपुर महानगरपालिका ३ का ५३ वर्षीय पुरुषको ज्यान गएको छ ।
यसैगरी नवलपुरको देवचुली नगरपालिका ११ का ८० वर्षीय पुरुषको कोरोना संक्रमणबाट ज्यान गएको छ । तीनैजना कोरोना संक्रमितको अस्पतालको कोभिड आईसीयू कक्षमा उपचारको क्रममा निधन भएको छ । भरतपुर अस्पतालमा एक जना धादिङ र एक जना चितवनका गरी दुई जनाको पनि कोरोना संक्रमणबाट ज्यान गएको छ ।
