काठमाडौं । बिद्रोही नेकपाको ब्युरो सदस्य सहित दुई नेता समातिएका छन् । ब्युरो सदस्य काशीराम घिमिरे ‘प्रतीक’ र पार्टी सदस्य विज्ञान राईलाई प्रहरीले गिरफ्तार गरेको हो उनिहरुलाई हतियार र बन्दोबस्तीका सामान सहित मोरङ प्रहरीले पक्राउ गरेको छ ।
स्थानीयहरुसँग चन्दा असुल उपर गर्ने कार्य भइरहेको सूचनाका आधारमा मोरङको मिक्लाजुङ गाँउपालिका वडा नं. १ घुर्मिसेस्थित बिजुलीप्रसाद तिम्सिनाको खाली घरमा खानतलासी गर्दा सप्तरी सुरुङ्गा नगरपालिका वडा नं. २ का काशिनाथ घिमिरे र इलाम चुलाचुली वडा नं. ६ का विज्ञान राई पक्राउ परेका हुन् ।
उनीहरुको साथ बाट भरुवा बन्दुक, जिलेटिन ३ केजी, सुतली बम, सकेट बम, इलेक्ट्रिक डेटोनेटर लगायत बन्दोबस्तीका सामानहरु बरामद गरिएको र आवश्यक अनुसंधान र कारवाही सुरु गरिएको मोरङका प्रहरी उपरीक्षक सन्तोष खड्काले जानकारी दिनुभयो ।
यता नेपाल कम्युनिस्ट पार्टी मेची–कोसी ब्युरोले विज्ञप्ति जारी गरी पार्टी कामको सिलसिलामा रहेका ब्युरो सदस्य काशीराम घिमिरे ‘प्रतीक’ र पार्टी सदस्य विज्ञान राईलाई अपहरण शैलीमा गिरफ्तार गरी जनतालाई समेत आतङ्कित पारेको भन्दै गिरफ्तार व्यक्तिहरूलाई रिहा नगरिए सरकारले ठुलो मूल्य चुकाउनुपर्ने चेतावनी दिएको छ ।
यस बिषयमा नेपाल कम्युनिस्ट पार्टी मेची–कोसी ब्युरो ब्युरो झ्न्चार्ज प्रतापले जारी गरेको बिज्ञप्ति भनेको छ – “हाम्रो पार्टीका ब्यूरो सदस्य काशीराम घिमिरे प्रतीक र पार्टी सदस्य विज्ञान राईलाई केपी – वादल नेतृत्वको सामाजिक फासीवादी सरकारको ठाडो आदेशमा २०७७ कात्तिक १२ गते मोरङ जिल्ला मिक्लाजुङ्ग गाउँपालिका वडा नं.१ मा शान्तिपूर्णढगले पार्टी काममा रहेका बेला अपहरण शैलीमा पक्राउ गरिएको र जनताको घरमा भएका लत्ताकपडा तथा खाद्यान्नका सामानसमेत जलाएर नष्ट गराई जनतालाई आतंकित बनाएको घटनाप्रति घोर भर्त्सना गर्दछौं ।
पक्राउ गरिएका हाम्रा जिम्मेवार कार्यकर्तालाई स सम्मान रिहाइको माग गर्दछौं । अन्यथा सामाजिक फासिवादी दलाल सरकार र उसका मतियारहरुले महँगो मूल्य चुकाउनु पर्ने कुरा यसै विज्ञप्ति मार्फत जानकारी गराउदछौं।”
