काठमाडौं । भोलिबाट काठमाडौं उपत्यकामा निषेधाज्ञा थप खुकुलो बनाउने निर्णय भएको छ । काठमाडौँ, भक्तपुर र ललितपुरका प्रमुख जिल्ला अधिकारीको बैठकले जोरबिजोर प्रणालीमा यातायात र पसल खुलाउने निर्णय गरेको छ । तर, स्वास्थ्य मापदण्ड भने पालना गर्नुपर्ने निर्णय पनि गरिएको बताइएको छ ।
गृह मन्त्रालयसँगको छलफलपछि तीनै जिल्लाका प्रमुख जिल्ला अधिकारीले निषेधाज्ञालाई खुकुलो बनाउने निर्णय गरेका छन् । काठमाडौंका प्रमुख जिल्ला अधिकारी जनकराज दाहालका अनुसार सामाजिक दूरी कायम गरी सर्वसाधारणले सचेत हुनुपर्ने प्रमुख जिल्ला अधिकारीले छलफलले निष्कर्ष निकालेको छ ।
अवस्था हेरर निश्चित क्षेत्र मात्रै खुलाउने र सार्वजनिकको हकमा १६ भन्दाबढी सिट भएका सवारी साधन मात्रै संचालन गर्न पाउने भएका छन् । भदौ ३ गतेदेखि जारी निषेधाज्ञा जारी राति १२ बजे सकिँदैछ ।
यसैबीच काठमाडौं उपत्यकामा थप ४६४ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार काठमाडौंमा ३९४, भक्तपुरका ३६ र ललितपुरका ३४ जनामा कोरोना भाइरस संक्रमण पुष्टि भएको छ । मंगलबार भन्दा आज संक्रमितको संख्या बढेको छ ।
त्यसैगरी बुधबार देशभर १ हजार ८१ जना कोरोना भाइरसका नयाँ संक्रमित थपिएका छन् । मंगलबार ९०२ जना थपिएका थिए । सोमबार ९७९ जना थपिएका थिए । आइतबार ९८० जना थपिएका थिए । हालसम्म नेपालमा ४९ हजार ९१९ जनामा संक्रमण पुष्टि भएको छ ।
त्यसैगरी आज ज्यान गुमाउनेको सँख्या ६ जना छन् । नेपालमा कोरोना संक्रमणबाट ज्यान गुमाउने संख्या ३१२ पुगेको छ । मंगलबार पनि ६ जनाको ज्यान गएको थियो ।सोमबार ११ जनाको ज्यान गएको थियो ।
कोरोनाबाट देशभर निको हुनेको संख्या ३३ हजार ८८२ पुगेको छ । आज निको हुनेको संख्या ९१८ जना छ । मंगलबार २,२८७ जना निको भएका थिए । सोमबार १,७३६ जना निको भएका थिए । आइतबार १,८१४ जना निको भएका थिए ।
स्वास्थ्य तथा जनसंख्या मन्त्रालयले दिएको जानकारी अनुसार पछिल्लो २४ घण्टामा गरिएको ११ हजार १०७ पीसीआर परीक्षण गरिएको छ ।
हालसम्म कूल पीसीआर परीक्षण संख्या ७ लाख ९९ हजरा ३४१ पुगेको छ ।
हाल देशभर सक्रिय संक्रमित संख्या १५ हजार २५ छ । जसमध्ये ७ हजार ९८८ जना संस्थागत आइसोलेसनमा छन् भने ७ हजार ३७ जना होम आइसोलेसनमा छन्। क्वारेन्टिनमा रहेकाको संख्या ५ हजार ४८० पुगेको छ।
