अछाम । कोरोनाभाइरस संक्रमणविरुद्ध विश्वभर पहिलो पंक्तिमा सेतो ड्रेसका सिपाही अर्थात स्वास्थ्यकर्मी खटिरहेका छन् । आफ्नो ज्यानको बाजी थापेर कोरोना संक्रमितलाई बचाउन उनिहरु रातदिन खटिरहेकाे छन् । मानव जातिले कोरोनासँग जित्ने वा हार्ने भन्न कुरा स्वास्थ्यकर्मीकै हातमा छ ।
कोरोना संक्रमितलाई बचाउन अहिलेसम्म डाक्टर, नर्ससहित हजारौं स्वास्थ्यकर्मीहरुले ज्यान गुमाइसकेका छन् । तर, पनि रातदिन उपचारमा खटिरहेका छन् । स्वास्थ्यकर्मीहरु आग्रमोर्चामा रहेर कोरोनासँग भिडिरहेकोले बीमालगायतका सुविधाको व्यवस्था सरकारले गरिरहेका छन् । नेपाल सरकारले पनि अग्रमोर्चामा खट्ने स्वास्थ्यकर्मीहरुको बीमालगायतका सेवा प्रदान गर्ने निर्णय गरेको छ । सोहीअनुसार स्वास्थ्यकर्मीको कोरोना बीमा गर्नुको साथै थप सुविधा उपलब्ध प्रदान गरिएको छ ।
तर, अछामको पञ्चदेवल विनायक नगरपालिकाले अग्रमोर्चामा खटिएका स्वास्थ्यकर्मीहरुमाथि भने विभेद गरेको छ । नगरपालिकामा कार्यरत कर्मचारीको कोरोना बीमा गर्दा स्वास्थ्यकर्मीहरुलाई छुटाइएको छ । कोरोना संक्रमित वा सम्भावित संक्रमितको स्वाब संकलन र उपचारमा खटिने स्वास्थ्यकर्मीलाई छुटाएर नगरपालिकाले अन्य कर्मचारीको मात्रै कोरोना बीमा गराएको छ ।
बीमामा विभेद गरिएपछि अग्रमोर्चामा खटेर नगरपालिकालाई कोरोनामुक्त गराउन सफल स्वास्थ्यकर्मीहरु असन्तुष्ट बनेका छन् । नगरपालिका कार्यालयभित्र काम गर्ने ४० कर्मचारीको बीमा गर्दा आफूहरुलाई छुटाएर अन्याय गरेको स्वास्थ्यकर्मीहरुले बताएका छन् ।
नगरपालिकाका स्वास्थ्य संयोजक लक्ष्मिकान्त बजगाईले कोरोनाविरुद्ध नगरपालिकाभित्र फिल्डमा ६० जना स्वास्थ्यकर्मीहरु खटिएको र उनीहरुको कोरोना बीमा नगरिएको स्वीकार गरे । उनले नगरपालिका कार्यालयभित्र काम गर्ने कर्मचारीको बीमा गरिएपनि स्वास्थ्यकर्मीलाई छुटाइएको बताए ।
“कोरोनाविरुद्ध फिल्डमा खटिने स्वास्थ्यकर्मीको बीमा गर्नुपर्ने भएपनि नगरपालिकाभित्र फिल्डमा खटिएका करिब ६० साथीहरु कसैको पनि गरिएको छैन । बीमा गर्ने भनिएको थियो तर गरिएको छैन” बजगाईले भने । स्वास्थ्यकर्मीहरुले बीमा गराउन आफूले पहल गरिरहेको संयोजक बजगाईले अनलाइन डबलीसँग बताए । तर, बजगाईले आफ्नो बीमा गराएको र अरुलाई बेवास्ता गरेको केही स्वास्थ्यकर्मीहरुले आरोप लगाएका छन् ।
त्यसैगरी नरपालिकाका वडा नम्बर ८ बारला स्वास्थ्य चौकीका प्रमुख जितेन्द्र केसीले पनि आफूहरुको कोरोना बीमा नगरिएको बताए । कोरोनाविरुद्ध खट्ने स्वास्थ्यकर्मीको चैत्रबाटै बीमा गर्ने निर्णय भएको सुनेको तर आफूहरुको अहिलेसम्म नगरिएको बताए । नगरपालिका कार्यालयभित्र काम गर्ने केही कर्मचारीको कोरोना बीमा गराइएको र बजेट नभएकोले फिल्डमा खट्ने स्वास्थ्यकर्मीको कोरोना बीमा नगरिएको भन्ने आफूले सुनेको बताए ।
“चैत्रबाटै कोरोना बीमा गर्ने भन्ने सुनिको थिएँ तर आजको मितिसम्म बीमा गरेको जानकारी पाएको छैन । नगरपालिका कार्यालयभित्र काम गर्ने केही कर्मचारी साथीहरुको बीमा गरिएको सुनेका छौं । अब हाम्रो पालो पनि आउछ की भन्ने लागेको छ” केसीले अनलाइन डबलीसँग भेन । बीमामा समेत विभेद गरेपछि स्वास्थ्यकर्मीहरुले स्थानीय सरकारले आफूहरुको पिरमर्का नबुझेको भन्दै गुनासो गर्ने गरेको केसीले बताए ।
संयोजक बजगाईका अनुसार नगरपालिका अहिले कोरोनामुक्त रहेको छ । विभिन्न समयमा भारतबाट घर फर्केका र अन्य गरी ५० जनामा कोरोना पोजेटिभ देखिएको तर अहिले सबै निको भएर घर फर्किसकेको उनले बताए ।
यस नगरपालिका भित्रै काम गर्ने कर्मचारीको कोरोना बीमा गरेर स्वास्थ्यकर्मीमा छुटाएको विषयमा नगरपालिकाका नि. कार्यकारी प्रमुख पदमबहादुर माझीसँग जानकारी लिन खोज्दा सम्पर्क हुन सकेन ।
- फोटोः दिपेन्द्र धामीको फेसबुकबाट
