News Portal

  • विप्लवले भने-संसद र सरकार देशको हितमा एक पाइला हिड्यो, जनजागरणलाई मत्थर मात्र नपारियोस्

    डबली संवाददाता२०७७ जेठ ३२ गते
    ५४१ पटक

    काठमाडौँ । नेपाल कम्युनिस्ट पार्टीका महासचिव विप्लवले संसद र सरकारले देश र जनताको हितमा एक कदम अगाडि हिडेको बताएका छन् । शनिबार नेपालको राजनीतिक र प्रशानिक नक्सासहित निशान छापको लागि सरकारले दर्ता गरेको संविधान संशोधन विधेयक सर्वसम्मत रुपमा पारित भएपछि विप्लवले यसो भनेका हुन् ।

    आइतबार विहान विज्ञप्ति जारी गरेर विप्लवले नेपाली देशभक्त जनता, विज्ञ, बुद्धिजीवी र क्रान्तिकारी शक्तिहरुको निरन्तर संघर्षको दवावमा परेर सरकार नयाँ नक्सा पास गर्न बाध्य भएको बताए । “भारतले नेपालका लिम्पियाधुरा, लिपुलेक, कालापानी ५८ वर्षदेखि आफ्नो कब्जामा राखेको छ । त्यसका विरुद्ध नेपाली देशभक्त जनता, विज्ञ, बुद्धिजीवी, क्रान्तिकारी शक्तिहरूले निरन्तर सङ्घर्ष गर्दै आएका छन् । उक्त जनमत र सङ्घर्षको दबाबमा परेर केपी ओली सरकार २०७७ जेठ ३१ गते उक्त भूभागहरू समेटिएको नक्सा संसदबाट पास गर्न बाध्य भएको छ” विज्ञप्तिमा भनिएको छ ।

    विप्लवले यसलाई जनजागरण मत्थर पार्ने कार्यमा सिमित हुन नहुने बताउँदै यथाशीघ्र कुटनीतिक र राजनीतिक पहल गरेर कालापानी क्षेत्रबाट भारतलाई फर्काउन र अतिक्रमणमा परेका भूभागलाई नेपालको पत्यक्ष स्वामित्वमा लिन अगाडि बढ्न आवश्यक रहेको बताए ।

    “सरकार र संसद्को यो निर्णय देशको हितमा एक कदम भएपनि अगाडि बढेको छ । हामी नक्सा पास गरेर जनजागरणलाई मत्थर मात्र पार्ने कार्यमा सीमित नरही यथाशीघ्र कूटनीतिक र राजनीतिक पहल गरेर कालापानी क्षेत्रबाट भारतलाई फर्काउन र यी भूभागलाई नेपालको प्रत्यक्ष स्वामित्वमा लिन अगाडि बढ्न आवश्यक छ भन्ने धारणा स्पष्ट पार्न चाहन्छौँ” विप्लवले विज्ञप्तिमा भनेका छन् ।

    सरकारको मुख मात्र नताकेर देशको सार्वभौमिकता र स्वाधीनताको पक्षमा हरदम जागरुक रहुन समेत विप्लवले आग्रह गरेका छन् । देशमाथिको अतिक्रमणविरुद्ध डटेर प्रतिरोध गर्ने प्रतिवद्धता गर्दै विप्लवले विज्ञप्तिमा भनेका छन्, “हामी आमनागरिकहरूलाई पनि सरकारको मुख मात्र नताकेर देशको सार्वभौमिकता र स्वाधीनताका पक्षमा हरदम जागरुक रहन अनुरोध गर्दछौँ । हाम्रो पार्टी देशमाथिका कुनै पनि साम्राज्यवादी अतिक्रमणलाई सहन नगर्ने बरु डटेर प्रतिरो,ध गर्ने प्रतिबद्धता स्पष्ट गर्न चाहन्छ ।”

    प्रतिकृया दिनुहोस्