अनलाइन डबली
काठमाडौँ । नेपाली कांग्रेसको विवाद निर्वाचन आयोगमा पुगेको छ । गगन थापा र विश्वप्रकाश शर्मा समूहले गरेको विषय महाधिवेशन विधानसममत नभएको भन्दै सभापति शेरबहादुर देउवा समूहले प्रतिनिधिको हस्ताक्षर बुझाएको हो ।
शुक्रबार विहान देउवा समूहले ८८५ जना विशेष महाधिवेशनमा सहभागी नभएको हस्ताक्षर बुझाएको हो । कार्यवाहक सभापति पूर्णबहादुर खड्का नेतृत्वमा गएको टोलीले कार्यवाहक प्रमुख निर्वाचन आयुक्त रामप्रसाद भण्डारीलाई हस्ताक्षर फिर्ताका निवेदनसहितको प्रमाण बुझाएको छ ।
कार्यवाहक सभापति खड्काका अनुसार देउवा समूहले आयोगमा विशेष महाधिवेशनको प्रमाण नपुग्ने आधार पेश गरेको छ ।
कार्यवाहक प्रमुख निर्वाचन आयुक्त रामप्रसाद भण्डारीले आयोगले विधि र पद्धतिभन्दा बाहिर गएर निर्णय नगर्ने बताएको सहभागी नेताहरुले बताएका छन् । भण्डारीले संविधान, ऐन, राजनीतिक दलसम्बन्धी नियमावली र कांग्रेसको विधान तथा नियमावलीका आधारमा मात्रै आफूहरू निर्णयमा पुग्ने बताए ।
देउवा समूहले ८८५ प्रतिनिधिको हस्ताक्षर नै आयोगमा बुझाएपछि गगन–विश्व समूह तनावमा परेको बताइएको छ । हिजो अस्ती मात्रै थापा समूह आयोगमा पुगेर विशेष महाधिवेशनबाट नेतृत्व चयन गरेको भन्दै विवरण अद्यवधि गराउन आयोगलाई अनुरोध गरेका थिए ।
