अनलाइन डबली
रौतहट । रौतहटका युवाहरु श्रम गर्न विदेशिएको अवस्थामा एक गाउँका युवा समुह सडक ग्रावेल र सरसफाइमा जुटेको छ ।
विगत केही दिन देखि चन्द्रपुर नगरपालिकाको वडा नम्बर ३ गैडाटारका युवाको समुहले खाल्डाखुल्टी सडकमा ग्रावेल विछ्याएको छ भने सडक किनारमा रहेको झाडी फडानी गरेको हो । समृद्ध गैडाटार निर्माण अभियानमा जुटौं युवा भन्ने नाराका साथ निशुल्क श्रमदान गरि सामाजिक रुपान्तरणको अभियानमा जुटेका हुन । यो अभियानको अगुवाइ गर्दै आएका स्थानीय युवा उपेन्द्र गोले अहिलेको समयमा निशुल्क
श्रम गर्ने कोहि पनि नभेटिने तर्क राखेका छन । निस्वार्थ भावका साथ गरिएको यो श्रमले पक्कै गैडाटारको मुहार फेरिने उनको भनाइ छ । सानो सानो कामका लागि पनि स्थानीय सरकार वा जनप्रतिनिधि ताक्ने काम राम्रो नभएकाले
गाउँभरीका युवा एकीकृत भएर गरिएको यो कार्य प्रशंसा योग्य भएको उनले बताए ।
उक्त युवा समुहले पुर्व टोल गुम्बा क्षेत्रको कालोपत्रे सडकमा भएका खाल्डाखुल्टीमा ग्रावेल विछ्याएको छ भने फुटबल चौर किनार , पुरानो टोल नमुना डाडा टोल र चादी पुल माथी पनि खाल्डाखुल्टी पुर्ने काम गरेको हो । अहिले गुम्बा परिसर र कर्मध्वज लामा सालिक क्षेत्रमा सरसफाईको काम भै रहेको छ ।
आफ्नो गाउँ ठाँउबाट नै परिवर्तन गर्न सकिन्छ भन्ने पाठ गैडाटार युवा समुहबाट सिक्न सकिन्छ । विकास र परिवर्तन सबैलाई चाहिएकाले गैडाटार युवा जस्तै अन्य गाउका पनि यस्ता किसिमका कार्यको थालनी गर्नु पर्छ । यो नै वडालाई समृद्ध बनाउने आधार निर्माण गर्न सकिने देखिन्छ ।
