अनलाइन डबली
काठमाडौँ । नयाँ प्रधानमन्त्रीको लागि नेकपा एमालेका अध्यक्ष केपी शर्मा ओलीले प्रधानमन्त्रीमा दाबी पेस गरेका छन् । राष्ट्रपति रामचन्द्र पौडेलले संविधानको धारा ७६ (२) बमोजिम बहुमतको सरकार गठनका लागि आह्वान गरेलगत्तै नेपाली काँग्रेसको समर्थनमा ओलीले दाबी पेश गरेका हुन् ।
शुक्रबार साँझ सभापति शेरबहादुर देउवासहित राष्ट्रपति कार्यालय शीतल निवास पुगेका ओलीले कांग्रेसका ८८ र एमालेका ७८ गरी १६६ सांसदको समर्थनमा प्रधानमन्त्रीमा दाबी पेस गरेका छन् ।
प्रधानमन्त्री प्रचण्डले विश्वासको मत नपाएपछि राष्ट्रपति पाैडेलले संविधानको धारा ७६ (२) बमोजिम नयाँ सरकार गठनका लागि आह्वान गरेका थिए ।
साना दलहरुलाई सँगै लिएर सरकार बनाउने भनिएपनि दाबी पेश गर्ने बेला भने ‘बाइपास’ गरिएको छ । साना दलप्रति विश्वास नभएकोले नै दाबी पेश गर्दा हस्तक्षार नराएको बताइएको छ । दाबी पेश गर्दा साना दललाई पनि हस्ताक्षर गराउँदा समर्थन फिर्ता लिएपछि विश्वासको मत लिनुपर्ने झन्झट आउन सक्ने भन्दै उनीहरुलाई सहभागी नगराइएको एमाले नेताहरुले बताएका छन् ।
काँग्रेस-एमाले गठबन्धनलाई जसपा, जनमत, जसपा नेपाल, लोसपा र नागरिक उन्मुक्ति पार्टीले साथ दिएका थिए ।
आज शनिबार सार्वजनिक बिदा भएकोले अब भोलि आइतबार मात्रै ओली प्रधानमन्त्रीमा नियुक्त हुनेछन् । ओलीको शपथ पनि आइतबार नै हुने बताइएको छ ।
