काठमाडौं । सरकारले कोशी प्रदेशको स्वास्थ्य तथा जनसंख्या मन्त्रालयको सचिवको जिम्मेवारी हेरफेर गरेको छ । संघीय मामिला तथा सामान्य प्रशासन मन्त्रालयले डा. राधिका थपलियालाई कोशी प्रदेशको सचिवमा जिम्मेवारी दिएको छ ।

बैशाख २७ गते बसेको मन्त्रिपरिषद् बैठकले संघको स्वास्थ्य तथा जनसंख्या मन्त्रालयको स्वास्थ्य शिक्षा प्रशासक प्रमुख रहेकी थपलियालाई प्रदेश सचिव बनाउने निर्णय गरेको थियो । सोही निर्णयअनुसार मन्त्रालयले बैशाख ३१ गते थपलियालाई प्रदेश सचिवको कामकाज गर्न पठाएको हो ।

“तपाईँलाई कर्मचारी समायोजन ऐन, २०७५ को दफा ११ को उपदफा (२) बमोजिम देहाय अनुसार काम काज गर्न खटाएको ब्यहोरा नेपाल सरकार (मन्त्रिपरिषद) को मिति २०८० वैशाख २७ गते को निर्णय अनुसार अनुरोध छ” थपलियालाई सचिवको रुपमा जिम्मेवारी दिएको पत्रमा उल्लेख छ ।

डा. थपलिया कोरोना कालमा स्वास्थ्य बीमा बोर्डकी कार्यकारी निर्देशकको जिम्मेवारी कुशलतापूर्वक सम्पन्न गरेकी थिइन् ।

यसअघि सचिवको रहेकी डा. सुधा देवकोटा सिटी स्क्यान मेसिन लगायत खरिद विवादमा मुछिएकी थिइन् । व्यपारीसँग सेटिङ गरेर सिटी स्क्यान खरिदमा साढे तीन करोड कमिसन खेलमा डा. देवकोटा पनि मुछिएपछि विवादित बनेकी थिइन् ।