अनलाइन डबली
काठमाडौँ । आज देशभरका अस्पतालहरुमा आकस्मिकबाहेका सबै सेवा बन्द गरिएको छ । हेटौँडास्थित सन्चो अस्पतालका डाक्टरमाथि भएको आक्रमणको विरोधमा नेपाल चिकित्सक संघको आयोजनामा आज आकस्मिकबाहेका सबै सेवा बन्द गरेर चिकित्सक तथा स्वास्थ्यकर्मी आन्दोनमा उत्रेका छन् ।
घटनामा संलग्न भएका ४ जनालाई पक्राउ गरी ३ दिनको म्याद थपेर अनुसन्धान सुरु भइसक्दा पनि चिकित्सकहरु आन्दोलनमा उत्रेका छन् । जिल्ला प्रहरी कार्यालय मकवानपुरका अनुसार रमा प्रधान, रमिता प्रधान, रोहित प्रधान र अनुप प्रधानलाई पक्राउ गरी थप अनुसन्धान भइरहेको छ ।
तर, सङ्घले आज देशभरका सम्पूर्ण सरकारी स्वास्थ्य संस्था, अस्पताल, मेडिकल कलेज, निजी अस्पताल तथा क्लिनिकहरूमा आकस्मिक सेवा बाहेकका सम्पूर्ण स्वास्थ्य सेवाहरू पूर्ण रूपमा बन्द गरिएको छ ।
बिरामीको उपचारमा लापरवाही गरेको भन्दै पीडित परिवारले सन्चो अस्पतालमा कार्यरत डा विकास थापा र डा प्रशान्त बिडारीमाथि भदौ २७ हातपात गरेका थिए । सोही घटनालाई लिएर चिकित्सकहरु आन्दोलनमा उत्रेका हुन् ।
सङ्घले घटनामा संलग्न सम्पूर्ण दोषीहरूको अविलम्ब छानबिन गरी फौजदारी अभियोग तथा स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन २०७९ बमोजिम कानुनी कारबाहीको सुनिश्चितता हुनुपर्नेमा समेत माग गरेको छ ।
